Ақтөбе облысындағы «Жайсаң» шекаралық өткізу бекетінде жүздеген жүк көлігі бірнеше тәуліктен бері тұр. Кезек жылжыр емес. Жүргізушілердің айтуынша, жуырда ғана енгізілген электронды кезек әбден әбігерге салған. Оның үстіне бекет үстімен өтетін «Самара-Шымкент» тасжолындағы жөндеу жұмыстары жағдайды тіпті қиындатып жіберген.

Жақсыбек Кемал, тілші:

Шекара бекетіне электронды кезек жүйесі енгізілген. Бұл — пилот жоба. Дегенмен жолаушылар әзірге оның артықшылығынан гөрі кемшілігі көп дейді. Өйткені алдын ала тіркеліп қойғанның өзінде арғы бетке бір тәуліктен бері өте алмай тұрғандар бар.

Электронды кезек жүйесі 19 мамырдан бастап енгізілген. Жүргізушілердің шекарадан еш кедергісіз өтуі үшін қолға алынған бұл әдіс керісінше, жағдайды күрделендіріп жіберген. Өйткені алдын ала тіркелмеген көлік жүргізушілері де кезекте тұр.

Мұрат Молдабев, көлік жүргізушісі:

Мысалы, электронды кезек істеп қойған, бірақ оған тұрақ жоқ. Негізінде тұратын жер болу керек, сол жерге жинап, көлікті біртіндеп шығаруы керек. Бүгін 3-і ме, 4-і күні кіретіндер алдыда тұрып алған.

Жақсыбек Кемал, тілші:

Бұл жерде жүздеген жүк көлігі бар. Кезектің соңы шекара бекетінен он километр әріде жатыр. Жүргізушілердің тағаты таусыла бастаған. Олардың кейбірі мұнда 2-3 тәуліктен бері тұр.

Тәуліктеп тұрған жүк көліктерінің көбі шет елден.

Адахам Якубов, көлік жүргізушісі:

Жолда көліктің көптігінен, сонымен қатар жөндеу жұмыстары нәтижесінде Ресейден қайтар жолға екі тәулік уақыт кетті.

Қазір шекара бекеті арқылы өтетін жол жөнделіп жатыр. Бұл жағдайды тіпті ушықтырды. Тәулігіне бұрынғыдай төрт жүз көлікті өткізу де мүмкін болмай тұр. Жаупты мамандар кептеліс жөндеу жұмыстарының кесірі дейді.

Әміржан Мұхамедияров, облыстық Мемлекеттік кірістер департаменті, экспорттық бақылау бөлімінің жетекшісі:

Қазір бұл жүйе қалыпты жұмыс істеп тұр. Ал кезектің пайда болуына негізінен жол жөндеу жұмыстары себеп. Жүк көліктерінің легі бағдаршаммен және шлагбауммен ретттеліп жатыр. Бұл бекеттің өткізу мүмкіндігін азайтады.

Электронды кезекке қатысты бизнес өкілдерінен де шағым көп. Осы уақытқа дейін Кәсіпкерлер палатасына 200-ден аса арыз түскен. Палата жағдайды реттеу үшін жол жөндеу жұмыстары аяқталғанша электронды жүйені алып тастай тұруды ұсынып отыр.

Жақсыбек Кемал