Мұсылмандар діни басқармасы Жаңа жыл мерекелері қарсаңында жұртшылық жаппай ойнайтын "Құпия Санта" ойыны туралы пікір білдірді, деп хабарлайды Sn.kz ақпарат порталы CMN.KZ порталына сілтеме жасап.
Басқарма адамның жүрегін жылытатын ұлттық құндылықтарды дәріптеуді ұсынды.
"Біздің дінімізде де, дәстүрімізде де “Құпия Санта” ұғымы жоқ. Сондықтан бөгде мәдени түсініктерді қабылдап, оны насихаттағаннан гөрі, адамдардың жүрегін жақындататын ұлттық салт-дәстүрлерге және исламның асыл құндылықтарына негізделген ұстанымдарды дәріптеген әлдеқайда орынды", – деп жауап берді басқарма өкілдері.
Сондай-ақ Қазақстан мұсылмандары діни басқармасы Жаңа жылдың діни мереке саналмайтынын еске салды. Алайда оны тек жылдың басталуы ретінде қабылдап, бұл уақытты игі істерге, өзара дұға-тілектерге және адамдарға ізгі ниет білдіруге арнаса, онда еш айып жоқ екені айтылды.
"Ал егер мерекелеу алкоголь ішу, ерлер мен әйелдердің шектен тыс араласуы және шариғатта тыйым салынған өзге де әрекеттермен қатар жүрсе, мұндайға жол беруге болмайды", – деп ескертті ҚМД
