Алматыда пойыз ішінде 53 адам уланып қалды. Қазір екі бала жансақтау бөлімінде жатыр. Алдын ала мәлімет бойынша оқиға кино түсірілімі кезінде болған. Түсірілім тобы жекеменшік серіктестіктен вагондарды жалға алған.
Гүлжан Көленқызы, тілші:
- Пойыздағы төтенше оқиға Алматы маңындағы Ұзынағаш станциясынан келе жатқанда орын алған. Вагон ішінде киноға түскен адамдар болған. Куәгерлердің айтуынша, барлығы қатты жаурап қалған. Аязды ауа райына қарамастан түсірілім сыртта да, вагон ішінде де жүргізілген. Суыққа әсіресе балалар шыдай алмаған. Сол кезде киностудия өкілдері вагонды жылыту үшін газ құрылғысын қолданған. Ішіндегі адамдар содан уланған деген күдік бар. Ыс тигендерді Алматы-2 вокзалынан 13 жедел жәрдем бригадасы алып ауруханаға жеткізді. Қазір балалар ауруханасына түскен 11 жеткіншектің екеуі жансақтау бөлімінде жатыр.
Құрметбек Тоқтарұлы, Балалар шұғыл медициналық көмек орталығы жансақтау бөлімінің дәрігері:
- 15 жастағы екі қыздың жағдайы ауыр деп бағаланды. Олар жансақтау бөліміне жатқызылды. Қалған тоғыз баланың жағдайы орташа ауырылықта болды. Олар токсикология бөлімінде ем алып жатыр. Бір баланың ата-анасы ауруханадан бас тартып, үйіне алып кетті.
Үлкендер тұрғылықты жері бойынша амбулаториялық емделуге жіберілді. Аталған дерек бойынша Алматы-1 станциясындағы желілік полиция басқармасы Еңбекті қорғау қағидаларын бұзу бойынша қылмыстық іс қозғады.
Мәлік Қайбар, ҚР ІІМ Көліктегі Пд бастығының орынбасары:
- Қазіргі уақытта оқиғаның барлық мән-жайларын анықтау үшін қажетті тергеу әрекеттері жүргізілуде, оның қорытындысы бойынша заңға сәйкес процессуалдық шешім қабылданатын болады. Өзге ақпарат Қылмыстық-процестік кодекстің 201-бабына сәйкес жария етуге жатпайды.
Жекеменшік пойызды киностудиялардың бірі жалға алғаны анықталды. Адамдарды түсірілімге Алматыдағы кастинг агенттіктерінің бірі шақырған. Түсірілімге қатысушыларды таңғы үштен бастап жинаған. Істің мән-жайы тергеу барысында анықталады.
Авторлары: Гүлжан Көленқызы, Радик Жакупов, Мұхит Құдықбаев
