«Шығыс сымбаты» халықаралық турниріне еліміздің әр өңірінен және шетелден келген 500-ден аса жас спортшы қатысып, өзара бақ сынасты, деп хабарлайды Egemen.kz.
Бұл турнирдің тарихы терең. «Шығыс сымбаты» додасы 30 жылдан бері үздіксіз өткізіліп келеді. Осы уақыт ішінде талай талант танылды. Бір кездері дәл осы алаңда әлемге әйгілі ресейлік гимнаст Алина Кабаева да өнер көрсеткен.
«Мен ұстаздық еткен жылдары 55-тен аса спорт шеберін дайындадым. Қыздарымның көбі өздері жаттықтырушы болып жұмыс істейді. Бірқатары Ресейге, жақын қалаларға кетті. Осылайша біздің спорт түрі кеңінен дамып келеді. Гимнаст қыздарымыз Азиадаға барып, бір күміс пен екі алтын алып келді. Бұл біздің облыс үшін өте үлкен жетістік», дейді жарыстың негізін қалаушы Лилия Кузьмина.
Биылғы турнирге Павлодар, Абай, Шығыс және Астана қаласының жас спортшыларымен қатар, Ресей, Белоруссия және Малайзиядан командалар келді. Спортшылар да, жаттықтырушылар да бұл додаға ерекше дайындықпен келген. Сымбаттылар сайысына 5 пен 15 жас аралығындағы спортшылар қатысып, үздіктер анықталды.
«Көркем гимнастикаға балалар өте ерте жастан келеді. Сондықтан, алаңда 3 күн бойы тәжірибесі де, деңгейі де әртүрлі спортшылар бір мезетте өнер көрсетті. Көрсеткіш көңілден шықты. Келесі маусымға лайықты бағыт-бағдар айқындалды. Биылғы маусым осымен аяқталды. Келесі кезең қаңтар айында басталады» деді облыстық кешенді мамандандырылған балалар-жасөспірімдер олимпиадалық резерв спорт мектебінің директоры Анар Жантасова.
Жарыс гала-концертпен түйінделді. Әр команда өздерінің үздік би қойылымын көпшілікке ұсынып, алаң атмосферасын ерекше күйге бөледі. Үздіктерді облыс әкімі Нұрымбет Сақтағанов марапаттады. Аймақ басшысы мұндай жарыстар жас гимнасттардың шеберлігін шыңдап, тәжірибе алмасуына мүмкіндік беретінін атап өтті.
Өскемен
