Ел президенті Тоқаев АҚШ-қа сапарында Украина басшысы Владимир Зеленскиймен маңызды келіссөз жүргізген болатын. Мемлекет басшысы Астананың соғыстан кейінгі Украинаны қалпына келтіруге әзір екенін, қазақстандық бизнестің Украинаны қалпына келтіру жұмысына қатысуға ниетті екенін жеткізіп, әлсіреп қалған экономикалық байланыстарды қалпына келтіруді ұсынған.
Қарашаның соңындағы КҚЖ жасалған шабуылдан кейін екі ел арасындағы экономикалық бұрынғы әріптестік қалпына келудің орнына кері кеткендей көрінген.
ҚР СІМ өкілі Айбек Смадияровтың айтуынша, ҚР СІМ басшысы Ермек Көшербаев Венаға жасаған сапары барысында Украиналық әріптесімен сөйлескен.
«Әрі қарай біз бұл мәселе бойынша пікір білдірмейміз. Украинамен баланыстамыз. Жабық дипломатиялық арналар арқылы жұмыс жүргіземіз. Қазір елшілер деңгейінде талқылаулар жасап жатырмыз», — дейді СІМ.
Украинаның соңғы уақытта Ресейдің стратегиялық маңызы бар энергеикалық нысандарына шабуылды үдеткені белгілі. КҚЖ-не жасалған шабуыл да сол қатарда. Десе де Киев Қазақстанның Ресеймен сауда-саттықта сақтыққа көшкенін дұрыс бағалап отырғандай. Атап айтқанда елімізде шектеуге ілінген тауарлардың Ресейге қайта экспортталуына тосқауыл қоятын бақылаудың жаңа ережесі енгізілген. Жүйе кемінде бір жыл бойы қолданыста болады, деп жазады БАҚ.
Жаңа ережеге сәйкес санкция тізіміндегі және қос мақсатта қолданылатын тауарларды экспорттау үшін ендігі жерде міндетті лицензия алу талап етіледі.
Сондай-ақ, Еуроодақ, АҚШ және Ұлыбританиядан әкелінген тауарға қатаң бақылау орнатылады. Бұдан былай мұндай өнімдердің ТМД аумағына, әсіресе Ресейге қайта экспортталуына тыйым салынады.
«Қазақстан санкцияға ресми қосылмаса да «қара тізімдегі» тауардың транзитіне қарсы күрес мәселесінде Батыстың сөзін сөйлейтінін аңғартты. Астана Мәскеудің қорғаныс-өнеркәсіп кешеніне ауадай қажет тауарларға қолжетімділікті біртіндеп шектеуге дайын екенін көрсетіп отыр», — деп тұжырымдаған Киев тарапы.
Украина сыртқы барлау қызметінің пайымдауынша, Қазақстан осылайша Батыс елдері мен Ресей арасында тепе-теңдік сақтай отырып, орыстардың санкцияны айналып өту тәсілдерін барынша тарылтуға кіріскен.
