Қазақстан мен Қытай ара­сындағы ғылыми-иннова­циялық серік­тестік жаңа кезеңге қадам бас­ты. Қытайдың «Xi’an Jiaotong University» жанынан «Шәкәрім» мәдени зерттеулер орталығы құ­рыл­ды. Бұл туралы Ғылым және жо­ға­ры білім министрлігі хабарла­ды.

Қытайдың «Xi’an Jiaotong University»-де «Бір белдеу, бір жол» бастамасының озық ғылыми-технологиялық жетістіктерімен алмасу жөніндегі халықаралық конференция ұйымдастырылды. Конференция аясында қытайлық университет атынан Шәкәрім университетіне «Электрлік автоматтандыру жөніндегі Қазақстан–Қытай бірлескен зертханасына» арналған жабдықтардың алғашқы партиясын беру туралы естелік сертификат табысталды. Сондай-ақ «Шәкәрім» қазақ-қытай мәдени зерттеулер орта­­лығының салтанатты ашылуы өтті. Бірлескен зертхана ашу жөніндегі келісімге биылғы 16 маусымда Астанада өткен «Орталық Азия – Қытай» индустриялық-инвестициялық ынтымақтастық форумы аясында қол қойылған болатын.

Министрлік таратқан ақпаратта көрсе­тіл­гендей, жаңадан құрылатын зертхана екі ел арасындағы технология алмасу мен өндірістік серіктестікті дамытуда маңызды рөл атқарып, ғы­лыми жаңалықтарға негізделген ортақ экономикалық тізбектің дамуын жылдамдатады. Жобаның негізгі мақсаты – өңірдегі инновацияларды дамыту, өн­дірісті жаңарту және ғылым мен өндіріс арасындағы байланысты нығайту.

«Бұл зертхана – идеядан нақты іске айналған серіктестіктің айқын нәтижесі. Ғылым мен технология саласындағы осындай ынтымақтастық – Президент Қасым-Жомарт Тоқаевтың инновациялық даму және интеллектуалды ұлт қалып­тастыру стратегиясымен үндес», деп атап өтті Ғылым және жоғары білім вице-министрі Гүлзат Көбенова.

Кездесудің басты оқиғасы Сиань Цзяотун университетінің жанынан «Шәкәрім» қазақ-қытай мәдени зерттеулер орталығының ашылуы болды. Бұл – ұлы ойшылдың шығармашылығы мен философиясына арналған шетелдегі тұңғыш институцио­налды орталық. Халықаралық деңгейде ашылған орталықтың негізгі міндеті – Қазақстанның тарихы мен мәдениетін, соның ішінде Шәкәрім мұрасын терең зерделеу, сондай-ақ бірлескен білім және ғылыми зерттеу жобаларын іске асырудағы өзара тиімді платформаны қалыптастыру, қазақ мәдениетін Қытайда кеңінен таныстыру, екі ел арасындағы мәдени және ғылыми байланыстарды нығайту.

Орталық Ғылым және жоғары білім министрлігінің қолдауымен, Шәкә­рім университеті мен Сиань Цзяотун университетінің серіктестігінің нәти­жесінде ашылып отыр. Келушілер орталықтан Шәкәрім Құдайбердіұлының өмірі мен мол мұрасы туралы қазақ және қытай тілдерінде толық ақпарат ала алады. Сонымен қатар қазақ халқының ежелгі дәуірден бүгінге дейінгі мәдени даму кезеңдері туралы материалдар ұсынылады.

Шәкәрім университетінің ректоры Думан Орынбеков «Xi’an Jiaotong University» президенті Чжан Лицюньге және Ғылым және жоғары білім министрлігіне екі елдің академиялық және мәдени бастамаларын сенімге, ғылыми прогреске және өзара дамуға негізделген бірыңғай стратегияға біріктіргені үшін шынайы алғыс білдірді.

«Шәкәрім» қазақ-қытай мәдени зерттеулер орталығының ашылуы – ерекше мәнге ие тарихи қадам. Біздің университет қазақ ойшылы Шәкәрімнің атында. Сондықтан орталықтың ашылуы біз үшін үлкен жетістік деп білемін. Шәкәрім университеті мен «Xi’an Jiaotong University» арасындағы серіктестік мәдениеттер мен ұрпақтарды біріктіретін сенім мен достық кеңістігін қалыптастырады. Осы орталықты ашуға қызмет жасаған екі университет қызметкерлеріне алғыс айтамын. Бұл орталық ғылыми-мәдени жағынан екі елдің жетістіктерін насихаттауға қызмет атқаратынына сенімдімін», деді ректор.