Мұндай олқылықтың жолы дер кезінде кесілді.
Бүгінде мемлекеттік мекемелер азық-түлікті жеткізу ісінің өзін мемлекеттік сатып алулар сайты арқылы іске асыратыны белгілі. Бірақ соның өзінде бағаны негізсіз белгілейді, деп хабарлайды inbusiness.kz тілшісі.
Павлодар облысы бойынша экономикалық тергеп-тексеру департаментінің өкілдері аталған мемлекеттік сатып алулар сайтына мониторинг жүргізу барысында өңірдегі бюджеттік ұйымдардың бірі азық-түлікті нарықтағы бағадан айтарлықтай жоғары бағаға сатып алмақ екенін анықтаған.
Департамент басшысы орынбасарының міндетін атқарушы Жоламан Қиналбековтің айтуынша, кейбір өнімдердің бағасы шамамен үш есе қымбатқа дейін жеткен.
"Жалпы азық-түліктің бағасы 30%-дан 238%-ға дейін жеткен. Мысалы, қарақұмық бағасы 191%, ұнның бағасы 238%, картоптың келісі 78% және сәбіздің бағасы 30% қымбат болып көрсетілген", – деді Жоламан Қиналбеков.
Аталмыш департамент мамандары іске араласқан соң ғана мемлекеттік мекеме сатып алу бағаларына түзетулер енгізді. Сөйтіп, 10 млн теңге үнемделді. Егер сайттағы бағалар дер кезінде сүзгіден өтпесе, мемлекет қазынасы осындай қомақты сомадан қағылып қалар еді.
Ал өнімдерді қымбатқа сатып алмақ болған мекеме басшылығы жауапкершілікке тартылған жоқ. Себебі сауда болған жоқ. Бірақ экономикалық тергеп-тексеру өклідері бюджеттік ұйым өкілдерінің басын қосып, мемлекеттік сатып алу ежересін тағы бір мәрте түсіндіріп, ескертулер жасады.
