"Қайрат" пен "Астана" ел біріншілігінің чемпионын анықтау үшін 26 қазанда кездеседі.

Бұл туралы Caravan.kz медиа порталы хабарлайды.

Матч Алматыда өтеді

26 қазанда Алматының Орталық стадионында өтетін соңғы, 26-шы тур ойынында маусымның тағдыры шешілмек. Қазір «Қайрат» 58 ұпаймен көш басында тұр. Екінші орында келе жатқан «Астана» екі ұпайға артта. Осылайша алматылықтарға тең ойын да жеткілікті болса, елордалықтар үшін тек жеңіс керек.

22 қазанда матчтың билеттері сатылымға шықты. Футбол жанкүйерлері асыға күткен матч билеттерінің бағасы мынадай болып белгіленді:

Солтүстік және оңтүстік трибуналар – 1500 теңге,

Шығыс трибуна (2-санат) – 3000 теңге,

Шығыс трибуна (1-санат) – 3500 теңге,

Батыс трибуна – 5000 теңге,

Отбасылық ложа – 6000 теңге,

ал D ложасы – 7000 теңге.

Алматының Орталық стадионына 23 мың көрермен сыяды. Билеттер сатылымға шыққан сәтте-ақ қос команда арасындағы шешуші айқасты тамашалауға ниетті 10 мыңнан астам жанкүйер электронды кезекте тұрған.

Билеттерді Freedom SuperApp және Kairat SuperApp қосымшалары арқылы сатып алуға болады.

Командалардың қазіргі жағдайы қандай

Қазақстан чемпионы атағы мен келесі маусымдағы Чемпиондар лигасына жолдама үшін шешуші матч қызық болары сөзсіз.

«Қайрат» соңғы бес турда қатарынан жеңіске жетіп келеді. 25-ші турда «сары-қаралар» сырт алаңда «Қызылжарды» 0:1 есебімен ұтты. Жеңіс голын Дастан Сатпаев соқты.

Ал «Астана» 25-ші турда «Ақтөбені» 5:3 есебімен тізе бүктіріп, Премьер-лиганың шешуші кезеңіне интрига сыйлады. Елордалықтардың сапынан Джеффри Чинеду (хет-трик), Усман Камара және Назми Грипши көзге түсті.

«Қайрат» «Пафоспен» өткен сәтсіз кездесуден кейін чемпиондықты уыстан шығармауға барын салатыны белгілі. Алдағы матчта алматылықтар өз алаңында ойнайтыны да маңызды рөл атқармақ.

Еурокубокта кімдер ойнайды

• Қазақстан чемпионы – Чемпиондар лигасында (1 іріктеу кезеңінен);

• Күміс жүлдегер – Конференциялар лигасында (2 іріктеу кезеңінен);

• Қола жүлдегер – Еуропа лигасында (1 іріктеу кезеңінен);

• Төртінші орын иегері – Конференциялар лигасында (1 іріктеу кезеңінен).

Қазақстан Премьер-лигасының 2025 жылғы маусымы өз мәресіне жетуге жақын. Футбол сүйер қауымның назары “Қайрат” пен “Астана” арасындағы шешуші матчта. Чемпиондық атақтың тағдырын шешетін бұл кездесу жанкүйерлер арасында зор қызығушылық тудырып отыр. Алдағы жексенбіде өтетін маусымның финалы қос команданың жанкүйерлеріне жарқын эмоция мен интригаға толы сәттер сыйлайды деп сенеміз.