Қарағанды облысының әкімі Ермағанбет Бөлекпаев Tengrinews.kz-ке берген сұхбатында Нығматулиндерге қатысты пікір білдірді, — деп хабарлайды Massaget.kz тілшісі.
"Нығматулиндер отбасының кейбір мүшелеріне қатысты қылмыстық істер қозғалды. Бұрын "Қарағанды облысын бір ғана отбасы бақылап отырды" деген пікір айтылатын. Бұл рас па? Қазір жағдай қалай?" деген журналистің сауалына әкім былай жауап қатты:
"Бұрын не болғанын білмеймін, бірақ қазір ондай ықпал жоқ. Бұл мәселені ресми дереккөздерден сұраған жөн. Біздің облысқа қатысты ешқандай мәселе жоқ. Иә, Ерлан Нығматулиннің зауыттары бар, олар жұмыс істеп тұр. Кейбір қиындықтар болса, өздері шешіп отыр. Сондықтан облысқа қандай да бір әсері немесе ықпалы бар деуге негіз жоқ".
"Мәселелерін өздері шешеді ғой?" деген сұраққа әкім "Иә, олар — бизнесмендер, өздері жұмыс істеп жатыр", — деп жауап берді.
Айта кетейік, Нығматулиндер отбасы Қарағандыдан шыққан. Нұрлан Нығматулин әр жылдары Президент әкімшілігін басқарды, Астана әкімінің орынбасары, Қарағанды облысының әкімі және үш шақырылымда Мәжіліс төрағасы болды. Бұл қызметтен ол Қаңтар оқиғасынан кейін кетті. Оның бауыры Ерлан Нығматулин өндіріс пен бизнес саласында жұмыс істеді, Мәжіліс пен Сенат депутаты болды. Ал үлкен ағасы Арғын Нығматулин мемлекеттік қызметте және бизнес саласында еңбек етіп, облыстық мәслихат депутаты болды. Кейінгі жылдары бұл отбасына қатысты түрлі айып тағылып жүр.
Қызықты жаңалықтар мен видеоларды көру үшін TikTok арнамызға жазылыңыз!
