Қазақстан мен Малайзия арасындағы сауда-саттық ұлғайды. Биылғы жылдың алғашқы жартысында екіжақты тауар айналымы 50%-ке өсіп, 100 миллион доллардан асты. Бұл туралы еліміздің Сауда және интеграция министрі Арман Шаққалиев Куала-Лумпурда өткен халықаралық көрме аясындағы бизнес-форумда мәлімдеді, деп хабарлайды 24kz.
Кездесу екіжақты серіктестікке тың серпін берді.
Сауда және интеграция министрі Арман Шаққалиев бастаған қазақстандық делегация сапардың алғашқы күні Малайзияның бірқатар ведомство өкілдерімен кездесіп, келіссөздер жүргізді. Басқосу барысында азық-түлік қауіпсіздігін нығайту, ауыл шаруашылығы өнімдерін жеткізу, халал сертификаттау және инвестиция тарту мәселелері талқыланды. Нәтижесінде ынтымақтастық туралы меморандумға қол қойылды.
Арман Шаққалиев, ҚР Сауда және интеграция министрі:
- Осы алғашқы 2-3 жылдың ішінде біздің мақсатымыз – тауар айналымын 300 млн долларға жеткізу. Ондай мүмкіншілік бізде бар. Біз энергетика, логистика, транспорт ауыл шаруашылығы, өңдеу салаларында қандай жобалар болады. Сондай ақ Малайзиядан инвестиция тарту үшін, Қазақстаннан тауар жеткізу үшін бүкіл мәселелерді талқыладық. Енді қараша айында Малайзиядан Қазақстанға үлкен бизнес делегация келетін болады.
Дегенмен, екіжақты сауданы әрі қарай дамыту үшін іскер топтардың тікелей байланысы аса маңызды. Малайзия ұлттық сауда-өнеркәсіп палатасының басшылығымен өткен кездесуде осы мәселелер қозғалды.
Майкл Чай, Малайзия ұлттық сауда-өнеркәсіп палатасының бас хатшысы:
- Қазіргі таңда Қазақстан мен Малайзия арасындағы ең перспективалы ынтымақтастық салалары – пайдалы қазбаларды өндіру, мұнай өңдеу және халал сертификаттау. Олардың әлеуеті жоғары. Себебі Малайзия 650 миллион халқы бар Азия-Тынық мұхиты елдері үшін маңызды іскерлік және сауда орталығы болып саналады.
Сапардың басты мақсаты – Куала-Лумпурда өткен халал индустриясындағы ең ірі MIHAS халықаралық көрмесіне қатысу. Іс-шара халал өнімдерді өндірушілер мен сатып алушыларды біріктірді. Көрмеге 45 елдің өкілдері қатысты. Қазақстан павильонында 20 отандық экспорттаушы компания өз өнімдерін ұсынды. Сөрелерде ұн, бал, ет өнімдерінен бастап тұрмыстық химия, тоқыма және мата бұйымдарына дейін қойылды.
Құттыгүл Керімбай, қазақстандық ұн өндіруші компанияның өкілі:
- Біздің зауытымыз Шымкент қаласында орналасқан. Ұн, макарон және су өнімдерін өндіреміз. Басты мақсатымыз – осы Оңтүстік-Шығыс Азияға экспорт жасау. Өз өнімдерімізді жергілікті серіктестер мен халыққа таныстыру мақсатында қатысып отырмыз.
Көрме аясында «Kazakhstan Networking Session» атты бизнес-форум өтті. Онда қатысушыларға еліміздің сауда және инвестиция саласындағы әлеуеті таныстырылды. Сондай-ақ B2B кездесулер ұйымдастырылды. Бір үстелде қазақстандық және малайзиялық компаниялар бас қосып, бірлескен жобалар мен аймақтық нарыққа шығудың жаңа мүмкіндіктерін талқылады.
Авторлары: Анэль Еділқызы, Иманәлі Ануар
