Бүгін Қазақстан футбол федерациясының Талғардағы академиясына «FIFA таланттар академиясы» мәртебесі берілді.
Мұндай мәртебеге әлемде отыздан аса ел ғана ие. Ондай атақты алу оңай емес. Ол үшін FIFA-ның 54 түрлі талабына сай келу керек. Нақтырақ айтсақ, заманауи инфрақұрылыммен қатар академияда халықаралық сертификаты бар бапкерлер жұмыс істеу керек. Болашақ спортшыларды медициналық және ғылыми жағынан қолдап, дұрыс іріктеп, дамыта алатын бағдарламасы болуы тиіс. FIFA делегаттарының қатарында футболдан әлем және Европа чемпионы, француз футболшысы Кристиан Карамбё де болды. Ол балалармен естелік суретке түсіп, ақыл-кеңесін берді.
Геннадий Скуртул, Қазақстан футбол федерациясының техникалық директоры:
- Ең алдымен бұл жобаға енді әлемнің жетекші мамандары қолдау көрсетеді. Қазір таланттарды іріктеу және анықтау саласының сарапшысы, «Арсенал» клубында Арсен Венгермен бірге 10 жыл жұмыс істеген Стивен Морроу қонаққа келді. Сондай-ақ үлкен бапкерлік тәжірибесі бар Марьян Пахарь бар. Ол қазір FIFA-да сарапшы ретінде қызмет етеді. Сонымен қатар осы жобаның жетекшісі саналатын Ульф Шотт та осында.
