Мұндай бастама Қатарда өтіп жатқан Араб елдері лигасы мен Ислам ынтымақтастық ұйымының бірлескен саммитінде көтерілді, деп хабарлайды 24kz.
Мысыр президенті Абдель Фаттах ас-Сиси: «Израильдің Қатарға жасаған шабуылы аймаққа қорғаныс альянсын құру қажет екенін көрсетті», — деп санайды. Ал Түркия президенті Израильге қарсы экономикалық қысымды күшейтуге шақырды. Режеп Тайип Ердоғанның айтуына қарағанда, Палестинаны мемлекет ретінде мойындау мәселені шешпейді. «Сондықтан Тель-Авивке қарсы санкциялар енгізу қажет», — дейді. Саммитке қатысушы елдер Израильді Таяу Шығыста өз билігін жүргізгісі келеді деп айыптады.
Тамим бен Хамад әл Тани, Қатар әмірі:
- Биньямин Нетаньяху кейінгі екі жылда Таяу Шығыстың бейнесін өзгерттім деп мақтанады. Бірақ оның діттігені – араб әлемін жаулап алып, билігін жүргізу. Еврей үкіметі аймақ елдеріне әуе шабуылдарын жиі жасап, мұны үйреншікті жағдайға айналдыруға тырысуда. Бұған одан әрі көз жұма қарауға болмайды.
