Ұлыбританияда хирург сақтандыру ақшасын алу үшін екі аяғын кесіп тастаған. Ер адам өзіне сепсис басталуы үшін құрғақ мұз қолданған. Ол алаяқтық жасағанын мойындап, түрмеге қамалды, — деп хабарлайды Massaget.kz тілшісі "Доктор Питерге" сілтеме жасап.
49 жастағы Нил Хоппер — ұлыбританиялық хирург. Жуырда сот оны алаяқтық үшін 32 айға бас бостандығынан айырды: ол сақтандыру төлемдерін алу үшін өз аяғын әдейі кестірген.
Хоппер шамамен 500 мың фунт стерлинг (362 миллион теңгеден аса) өтемақы алған. Ол аяғын ампутациялауға барын салған. 2019 жылғы сәуірде құрғақ мұзды бірнеше сағат бойы терісіне басып, нәтижесінде аяғы үскен.
Жоспары іске асты. Хопперде сепсис басталып, гангрена дамыды. Екі аяғын тізеден төмен кесуге тура келді.
Операциядан кейін ол сақтандыру төлемін алып, оңалтудан өтті. Протездермен жүріп үйренді, ауруханада жұмысын жалғастырды, отбасымен уақыт өткізді.
"Хоппер мүмкіндігі шектеулі адамдар туралы фильмге де түсті. Ол өмірін, қалпына келу жолын және ешқашан берілмеу керек екенін айтты. Сақтандыру ақшасына автокемпер, гидромассаж ванна, пеш сатып алып, құрылыс жұмыстарына жұмсаған", — деп жазды The Guardian.
Бірақ бірнеше жылдан кейін шындық әшкере болды. Адвокаттар оның аяғы әдейі кесілгенін дәлелдеді. Хоппердің ерекше әуестігі болған: ол ампутацияға құмар болған. Психиатрияда "апотемнофилия" деген термин бар, бұл — сирек кездесетін психикалық ауру, онда адам денесінің бір бөлігі артық деп санап, оны ампутациялауды қалайды.
Сот Хопперді ақыл-есі дұрыс деп таныды. Оның үйінен әдепсіз мазмұндағы бейнелер табылды, олар да іс материалдарына енді. Хирург алаяқтықты мойындады.
Қазір ол жазасын өтеп жатыр. Оның отбасы аяғын әдейі жоғалтқанын білмеген. Әйелі ажырасуға арыз берген, дәрігер лицензиясынан айырылды. Ол сақтандыру компаниясына ақшаны қайтарып, үйінен де айырылуы мүмкін.
Хоппердің бұрынғы науқастары адвокаттарға жүгініп жатыр: олар хирургтің әуестігіне байланысты артық операция тағайындағанынан қауіптенеді.
Өзекті жаңалықтарды өз уақытында оқу үшін Facebook парақшамызға жазылыңыз!
