Танымал кәсіпкер Ербол Мәндібек бес уақыт намазға үгіттеп, әркімге иман байлығы туралы айтатын сақалдыларға тиісті.
Бұл туралы Caravan.kz медиа порталы хабарлайды.
Кәсіпкер өз ойын желідегі парақшасында білдірді.
«Намаз оқу әркімнің жеке шаруасы ғой. Кейбір кісілерді білемін, намаз оқиды бірақ ешкімге байқатпайды. Отырған жерінде дін тақырыбын қозғамайды. Мінезі көркем, сабырлы, ақылды. Артық сөзі жоқ, орнымен әзілдеп, орнымен әңгіме қозғап, сұрақ қойсаң толық тыңдап, толық жауап береді. Әттең осындай адамдарды өте сирек кездестіремін.
Өткенде бір отырыста болдым. Арамызда алты ауыз біреу отырды. Анағанда жағаласты, мынаған да жағаласты. Сөйтіп отырып сөзден ұрынды.
Братан сен намаз оқисың ба? Неге оқитыныңды жасырасың деп оттап қалды әлгі байсалды братқа.
Бауырым, менің намаз оқитынымды білу саған не үшін маңызды деп сұрады. Анау болса, жәй әшейін сұрағаным ғой деп жауап таппай өзінен өзі жер шұқып қалды.
Бұл да мықты екен. Бауырым, мен сені ұялттым, ыңғайсыз сұрақ қойдым. Мені кешіргейсің! Иә, намаз оқитыным рас, бірақ ол менің жеке шекарам. Жеке шекарамды жұртқа жайып былғағым келмейді. Әйелім, балам, және ең жақын досым біледі. Бұл сұрақ бойынша солармен сырласқан маған ұнайды деп жауап берді.
Тым-тырыс болып қалдық. Себебі, оның жауабына бәріміз басымызды изеп үнсіз келістік. Сол сәтте келесі бөлмеде отырған бір жігіт;
«Белкаға келіңдер, шәйға дейін белка ұрып тастайық»,-деп картаға шақырып жатты. Шын мәнінде ол жігіттің де ешкімде шаруасы жоқ еді. Намаз оқисың ба, ішесің ба, бастықсың ба, байсың ба оған бәрібір. «Кім болсаңдар да маған бәрібір, ең бастысы адам болсаңдар болды»,-деген сөзі есімде қалыпты», — деп жазды ол.
