Елордада азаматтарды алдап, Еуропа, АҚШ және Ұлыбританияға виза рәсімдеуді уәде еткен күдікті ұсталды. Ол сенімді теріс пайдалану арқылы жәбірленушілерге жалған уәде беріп, ірі көлемде қаржы жымқырған, деп хабарлайды Egemen .kz.
Тергеу деректеріне сәйкес, күдікті жәбірленушілерге әртүрлі елдерге ұзақ және қысқа мерзімді виза жасап беруге уәде берген. Қылмыстық жауаптылықтан жалтару мақсатында ол 60-тан астам жәбірленушімен жалған несиелік келісімдер жасап, өз әрекеттерін азаматтық-құқықтық қатынас ретінде көрсетуге тырысқан.
«Келтірілген шығын 330 млн теңгеден астам.Күдікті ұсталды, оның әрекеті ҚК-нің 190-бабы 4-бөлігінің 2-тармағы бойынша сараланып, соттың санкциясымен күзетпен ұстау түріндегі бұлтартпау шарасы қолданылды», деп хабарлады Астана қаласы прокуратурасының баспасөз қызметі.
Қазіргі таңда барлық жәбірленушілер анықталып, сотқа дейінгі тергеу амалдары жүргізіліп жатыр.
Қала прокуратурасы алаяқтық жасағаны үшін 10 жылға дейін бас бостандығынан айыру жазасы қарастырылғанын және кінәлі адамның мүлкі тәркіленетінін еске салады.
