Үржардан санавиациямен Астанаға жеткізілген 6 жастағы ұл бала жансақтау бөлімінен травматология бөліміне ауыстырылды. Бала есін біледі, бірақ жағдайы тұрақты ауыр. Күтім жасау үшін қасында анасы бар. №2 көпсалалы қалалық балалар ауруханасы осындай ақпарат таратты. Ал 9 жастағы қыз бала әлі жансақтау бөлімінде. Денсаулық сақтау министрі бүгін аталған ауруханаға барып, балалардың жағдайымен танысты. Үржар аудандық ауруханасында жатқан қыздың да жағдайын дәрігерлер тұрақты ауыр деп бағалап отыр.
Көлік жүргізушісінің жүрек талмасы ұстап қалған
Абай облысының Бестерек ауылында үш баланың өліміне әкеп соққан жол апаты кезінде көлік жүргізушісінің денсаулығы сыр беріп, жүрек талмасы ұстап қалған. Бұл туралы күдіктінің ұлы Ерқанат Серікұлы айтты. Оның айтуынша, көлік ішінде анасы да болған. Күдіктінің төрт баласы бар. Солардың үлкені Ерқанат Серікұлы елдің қабырғасын қайыстырған қайғылы жағдай үшін бүгін кешірім сұрады.
Ерқанат Серікұлы, күдіктінің ұлы:
Өте қайғылы жағдай болып жатыр. Көңіл айттық. Кешірім сұраймыз. Олар да жағдайға түсіністікпен қарап отыр. Ешкімнің де басына бұндай сынақпен бермесін. Ешкім мұндай жағдайды күтпейді ғой.Кешірім сұраймыз. Басымызды иіп кешірім сұраймыз.
Ержан Жақып
