Премьер-министр Олжас Бектенов сирек кездесетін металдар саласын дамыту мәселесі бойынша кеңес өткізді. Бүгінде геологиялық барлауды кеңейту және ғылыми-зерттеу базасын дамыту өзекті мәселе.
Әлемде сирек металдарға сұраныс жыл сайын 30%-ға артып келеді. Қазақстан бұл нарықтағы өз орнын нығайтуды көздейді. Елімізде бериллий, тантал, титан, рений сынды металдар өндіріледі. Былтыр 38 перспективалы кен орны ашылған. Келесі жылы барлау көлемі 2,2 млн шаршы шақырымға дейін жетпек. Үкімет 2024–2028 жылдарға арналған кешенді жоспарды жүзеге асырып жатыр. «ЖезқазғанРедМет» кәсіпорнында сирек металдар цехы жаңғыртылуда. Жиын қорытындысында Премьер-министр жер қойнауын терең зерттеу, аккумуляторлық материалдар мен ыстыққа төзімді қорытпалар өндірісін дамыту жөнінде тапсырма берді.
Ернұр Медет
