Маусымның басында Астанада жол апатына ұшыраған қалалық автобус жүргізушісі жазадан құтылып кетуі мүмкін. Оған қатысты қылмыстық іс тоқтатылды, — деп хабарлайды Massaget.kz тілшісі.
Полицияның Tengrinews.kz-ке берген жауабына сүйенсек, автобус жүргізушісінің кінәсі қылмыстық іс материалдарымен және сараптама қорытындыларымен расталған. Алайда Қазақстанда рақымшылық жарияланды. Сондықтан жүргізуші қылмыстық қудалауды тоқтату туралы өтініш берген.
"Қылмыстық іс рақымшылыққа байланысты тоқтатылды. Қылмыстық іс тоқтатылғанына қарамастан, адам қылмыстық жауапкершілікке тартылды деп есептеледі", — деп жазылған хабарламада.
Оқиғаның мән-жайы
Еске салайық, 2 маусымда Астанада автобус жол бойындағы бағанаға соғылды. Жол апаты Республика даңғылында болды. Оқиға салдарынан оннан аса адам зардап шеккені хабарланды. Кейін олар елорданың түрлі стационарларына жеткізілді.
Кейінірек Астанадағы автобус апаты салдарынан аяғынан айырылған қыз стационардан шығарылғаны белгілі болды.
Instagram парақшамызға жазылып, ең қызықты ақпараттарды бірінші болып оқыңыз!
