Атырау облысында түйелер белгісіз індеттен қырылып жатыр, — деп хабарлайды Massaget.kz тілшісі "КТК" телеарнасына сілтеме жасап.
Маусымнан бері Құрманғазы ауданында 200-ден аса қос өркешті жануар ауырып, 84 –і арам қатқан. Қазір елуден аса ойсылқара тұқымын мал дәрігерлері емдеп жатыр. Бірақ ветеринарлар мұның не індет екенін таба алмай жатыр. Ал қорадағы малы қырылып шығынға батқан ауыл тұрғындары үкімет тарапынан қолдау сұрайды
"Биыл түйелер ауырып, қатты қиындық көріп отырмыз. Себебі жалғыз мен емес, осы ауылдық бәрінде де түйе өліп жатыр. Ауруын таба алмай қатты қиналып отырмыз. Менің бес ана түйе, екі ботам өлді. Дәрігерлер көмегін жасамай жатқан жоқ, олар бар көмегін жасады. Біз тек сол малмен күн көріп отырмыз. Біздің ауылдың тыныс тіршілігі тек сол мал", — деді ауыл тұрғыны Фазиля Қабдолова.
Құрманғазы ауданына қарасты ауылдарда түйенің бұлай белгісіз індеттен өлуі былтыр да болған. Бірақ биыл жағдай өршіп тұр. Дыңғызыл, Еңбекші, Мақаш ауылдарында мал шығыны тым көп екен. Өлекселерді әкімдік шетінен көміп жатыр. Ветеринарлар сынамаларын Ұлттық референт ветеринария орталығына жіберген. Алайда қауіпті қоздырғыш анықталмапты. Осылайша төрт түліктің төресі қандай ауруға шалдығып, қырылып жатқаны беймәлім. Ал ауыл шаруашылығына жауаптылар министрлікке ұсыныс жібердік деп қол қусырып отыр.
"Облыс әкімдігі тарапынан ауыл шаруашылығы министрлігі, ветеринарияны бақылау және қадағалау комитетіне ұсыныс хат жолданып, осы аурудың нақты неден пайда болғанын анықтау мақсатында арнайы мамандарды жібертуін сұрадық. Енді хабар күтіп отырмыз", — деді Атырау облысы ауыл шаруашылығы және жер қатынастары басқармасы, ветеринария бөлімінің бас маманы Ықылас Азаматов.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
