Жамбыл облысында сирек кездесетін аурулармен ауыратын балалар бір жылдан бері тегін астан қағылған. Арнайы ас құрамын ішуі тиіс 54 баланың басым бөлігі созылмалы целиакиямен ауырады.
Асқазан, ішек жолдары бұзылған балалар кәнігі ас-ауқатты мүлде тұтына алмайды. Сондықтан ата-анасы мемлекеттен берілуі тиіс 6 түрлі глютенсіз өнімді сырттан сатып алуға мәжбүр. Жергілікті емханалар аспен қамтуды былтыр күзден бері тоқтатқан. Амалы таусылғандар ас іздеп Алматыға барамыз дейді. Ал арнайы тағам түрлері қымбат болатындықтан, қалтаға салмақ. Бір баланың ай сайынғы диеталық күтіміне әр ата-ана 300 мың теңгедей шығындалатынын айтады.
Гүлдана Назымбекова, Тараз қаласының тұрғыны:
Енді 2 тоқсан өтіп кетті. Бізге әлі ас-ауқат берілген жоқ! Біз соны талап етіп, сол бойынша қазір жиналыс өтті. Тағы да қарастырылуда, жиналыс болған сайын бізге шегеріп, «беріледі, беріледі», деген құр әңгімемен келіп жатыр.
Ал жауаптылар мемлекеттік сатып алу порталында азық-түлікке өтінім уақытылы берілді дейді. Бірақ құжаттарда өнім атауы көрсетіліп кеткендіктен, тіркеуден өтпеген. Енді тендер талабы бойынша қайта түзетпек. 2-рет өтінім беру уақыты екі аптаға созылады. Мәселе шілдеде толық шешіледі деп отыр. Айта кетейік, биыл есепте тұратын балаларды аспен қамтуға 113 млн теңге қаралған.
Сержан Назарбек, облыстық Денсаулық сақтау басқармасының басшысы:
Ата-аналар талабы бойынша қиындықтар болды. Олар «мына бір компанияның өнімдері керек, соны алғымыз келеді» деді. Бірақ бұл заңға қайшы. Біз мемлекеттік сатып алу порталында өнімдердің атаулары мен компания атын көрсете алмаймыз. Сол себепті де созылды. Енді біз порталдағы жалпы сипаттамалардың жазылу заңдылықтарын Шымкент қаласынан алып жатырмыз.
Данияр Әлімқұл
