Енді Израиль мен Иранның конфликтісіне тоқталайық. Кеше кешке және бүгінге қараған түні олар бір-бірін тағы соққылады. Екі жақтан да мерт болған және зардап шеккен адамдар бар.
Бүгін негізі Оманда Иран мен АҚШ арасында ядролық бағдарлама бойынша келіссөздердің алтыншы раунды өтуі керек еді. Мынадай ахуалдан кейін қайдағы келіссөз? — деп Иран бас тартты.
Жұма — 13 маусымға қараған түні Израиль Иранға соққы жасаған еді. «Тегеранның ядролық қаруы дайын болатын уақытқа көп қалған жоқ, сондықтан оны күтіп отыра алмаймыз» деп түсіндіреді. Сөйтіп соққыны баллистикалық ракета қондырғыларына, әскери базалар мен ядролық нысандарына жасаған. Оған қоса Иранның ядролық бағдарламасына жауапты, қатысты деп есептейтін жоғары лауазымды әскери қолбасшылар мен ядролық физикамен айналысатын ғалымдар өлтірілген.
Және Израиль Иран аумағындағы операциясын кеңейтетінін ашық айтып отыр. Жалпы, бұл операциясына дайындық былтыр күзде басталған. Израиль соққысы әскери нысандарды, басқа да маңызды инфрақұрылымдарды ғана қиратып жатқан жоқ. Моральдық соққысы тіпті ауыр. Израильдің айнымас одақтасы АҚШ-ң президенті «келіссөздер жүріп жатыр, олай істемеңдер» демегенін жасырмайды да. «Өте қатты кеш емес. Әлі де мүмкіндіктерің бар. Ядролық бағдарлама бойынша келісімге келіңдер» деп Иран билігінің қытығына одан сайын тиген. Иран өзінің әлін бағамдаса керек, бүгін сыртқы істер министрі Аббас Аракчи ядролық қару жасаудан бас тартатын мәмілеге қол қоюға дайын екендерін айтты. Бірақ мемлекетімізді «ядролық құқықтан» айыратын шарттарды қабылдамаймыз дейді. Мұны қалай түсінуге болады – қазіргі өртті сөндіре тұру амалы ма?
Жалпы Израиль мен Палестина, Израиль мен Иран конфликттері шешілмейтіндей көрінеді. Экзистенциалды сұрақтардың жауабы бір-біріне қайшы елдердің пәтуаға келуі екіталай.
Ал Украинадағы соғысқа келсек, Ресей басшысы мен АҚШ басшысының телефон әңгімелері аса бір ілтипатқа толы, бір-бірін қатты құрметтейтін әріптестердің сұхбатын еске түсіреді. Міне, жаздың екінші аптасы аяқталды, АҚШ президентінің Украинадағы соғысты тоқтата алмайтыны айқындалып қалды. Аналитиктер алдағы апталарда Д.Трамптың соғысты тоқтату процесінде араағайын болудан түпкілікті бас тартатынын болжайды.
