Павлодар облысында шомылу маусымы басталғалы жағажайларда демалушылар көбейді, деп хабарлайды 24kz.
Осыған орай қоғамдық құтқарушылардың жұмысы да қызды. Облыс бойынша 75 адам қоғамдық құтқарушы ретінде арнайы дайындықтан өтті. Олар алғашқы медициналық көмек көрсету және суға батқан адамды құтқару әдістерін меңгерді. Курс оқыған еріктілер жағажайларда кезекшілік атқарып, тұрғындардың қауіпсіздігін қамтамасыз етуге үлес қосады.
Николай Малыгин – кәсіби құтқарушы емес. Еркін күрестен спорт шебері алдағы уақытта судағы қауіп-қатерді азайтуға күш салмақ. Ол үшін арнайы курсқа жазылып, адамды құтқару әдістерін үйренді.
Николай Малыгин, қоғамдық құтқарушы:
- Адамдардың бәрі бірдей суда еркін жүзе алмайды. Сондықтан қырағылық керек. Төтенше жағдайлар қызметі ұйымдастырған арнайы оқуға қатысып, оқыс жағдайларда жылдам әрекет етуді үйрендік. Әрқашан көмекке келуге дайынбыз. Қажетті құралдармен қамтамасыз етті. Құтқару қайықтары, кеудешелер, құтқару шеңберлері бар.
Ақсу қаласының Төтенше жағдайлар бөлімінің қызметкерлері қоғамдық құтқарушыларға арналған арнайы оқыту курсын ұйымдастырды. Сабақ кәсіби құтқарушылардың басшылығымен өтті. Оқыту барысында еріктілерге суға батып бара жатқан адамды қауіпсіз түрде судан шығару, алғашқы медициналық көмек көрсету және төтенше жағдайларда дұрыс әрекет ету тәсілдері көрсетілген.
Сырым Сейітқазы, Ақсу қалалық ТЖБ Азаматтық қорғаныс офицері:
- Қазіргі таңда Ақсу қаласында бізде қоғамдық құтқарушылардың оқытуы жүргізіліп жатыр. Түскен үш өтінім бойынша 14 қоғамдық құтқарушы оқытылады. Олар біздің Ақсу қаласының 3 жағажайында қауіпсіздікті қамтамасыз етеді.
Қоғамдық құтқарушылар облыс аумағындағы 47 жағажайда кезекшілік атқарады. Олар су айдындарын тұрақты түрде бақылап, тұрғындардың қауіпсіздігін қамтамасыз етуге атсалысады. Қоғамдық құтқарушылардың жұмысы кәсіби мамандарға қолдау көрсетіп, судағы оқыс оқиғалардың алдын алуға мүмкіндік береді. «Бұл – шомылу маусымында жазатайым жағдайдың санын азайтуға бағытталған бастама», - дейді жауаптылар.
Авторлары: Қарлығаш Қасиетова, Марат Игіліков
