Астанадағы автобус апатынан кейін екі аяғынан айырылған 7 жасар Алуаға бүгін екінші ота жасалды. Дәрігерлер жеткіншектің денсаулығы жақсарып келеді дейді. Бірақ психологиялық жағдайы әлі де ауыр.
2 маусымның кешінде автобус ішінде болған Алуа ауруханаға аса ауыр халде жеткізілді. Бірінші сыныпты енді бітірген жеткіншек анасы және бауырларымен Астанада тұратын әжесіне қыдырып келіпті. Олар апат болатын күні автобустың алдыңғы жағында отырған. Қоғамдық көлік бағанаға соғылғанда Алуаның екі аяғы қысылып қалған.
Бахтияр Серік, Алуаның ағасы:
Ауруханаға екі аяқсыз келді ғой. Әлі шокта жүр, түсінбейді. Тоқтамай жылай береді, ұйықтамайды. Аяқтарын сұрайды. Жасап береміз деп уәде беріп жатырмыз. Жасалып жатыр сенің аяғың, жақында салып береміз деп. Солай жұбатып жатырмыз.
Алуа бүгін екінші отадан сәтті шықты. Енді реабилитациядан өтуі керек. Бәрі ойдағыдай болса, жарты жылдан кейін протезге тапсырыс беріп, жүре бастайды дейді дәрігерлер
Арслан Дүйсенбай, №2 балалар ауруханасының бөлімм меңгерушісі, травматолог:
Бастапқыда протезбен жүру қиынға соғуы мүмкін. Бірақ уақыт өте соның көмегімен толық жүріп кете алады. Бастысы – инфекцияның таралуына, сепсиске ұласып кетуіне жол бермеу. Тез қалыпқа келуі үшін психологиялық жағдайы да өте маңызды. Қазір бір емес, бірнеше психолог қолдау көрсетіп жатыр.
Қаржылай қолдау да көрсетіледі. Бүгін қала әкімі баспана берілетінін, сондай-ақ анасының шотына көмек ретінде 20 миллион теңге аударылатынын айтты. Бұдан бөлек, сақтандыру есебінен тағы 19 миллион 600 мың теңге төленеді.
Жеңіс Қасымбек, қала әкімі:
Әкімшілік қазір 10 миллион теңгені берді. Қосымша 10 миллион береміз деп жоспарлап отырмыз. Ресми түрде осыны айтып отырмын сізге, баспана мәселесі осы жерде шешіледі.
Алуаның анасы 5 баланы жалғыз тәрбиелеп отыр. Енді балаға үнемі күтім керек. Сондықтан Егінді көл ауылындағы балабақшадағы жұмысынан шығып, Астанаға келді. Еріктілер Алуаның еміне қаржылай көмек қажет екенін айтып, экранда көрсетілген нөмірді таратты.
Жанел Нұрболат
