ХХV қысқы Олимпиада ойындарына қатысатын ұлттық құраманың спорттық киім жиынтығы таныстырылды. Бұл туралы Туризм және спорт министрлігіне сілтеме жасаған KAZ.NUR.KZ хабарлайды.
Ведомстовның мәліметінше, жабдықтың техникалық талаптарын келісу, үлгілерін бекіту және жеткізілетін спорттық киімнің сапасын бақылау мақсатында арнайы жұмыс комиссиясы құрылған.
Оның құрамына Туризм және спорт министрлігінің, Ұлттық Олимпиада комитетінің, ведомстволық бағынысты ұйымдардың өкілдері, сондай-ақ танымал отандық спортшылар кірген.
Жұмыс комиссиясы ұлттық құраманың спорттық киімінің эскизін бекіткен. Қазіргі уақытта бұл эскиз Халықаралық Олимпиада комитетінде келісу рәсімінен өтіп жатыр.
Спорттық киім жиынтығы 22 атаудан тұрады. Оның ішіне Олимпиаданың ашылу және жабылу салтанаттарына арналған салтанатты форма, жарыс кезеңінде пайдаланылатын жылы сырт киімдер, сондай-ақ оқу-жаттығу жиындары мен күнделікті қолдануға арналған жаттығу және күнделікті киімдер кіреді.
Ұлттық құраманың спорттық киімі демеушілер есебінен сатып алынған.
Туризм және спорт министрлігі 2026 жылғы қысқы Олимпиадаға дайындық бойынша жоспарлы жұмыстарын жалғастырып жатыр.
Айта кетейік, ХХV қысқы Олимпиада ойындары 2026 жылғы ақпанда Италияның Милан және Кортина-д’Ампеццо қалаларында өтеді.
Мәтіннен қате тапсаңыз, бізге жазыңыз
