Оралдағы перзентхана лифтісінде көз жұмған әйелдің өліміне қатысты сот үкімі шықты. 4 жылға созылған даудан кейін қайғылы оқиғаға кінәлі деп айыпталған перзентхананың бұрынғы басшысы ақталды, деп хабарлайды "Астана" арнасы.
Сот материалдарынан белгілі болғандай, 50 жастағы азаматша перинаталдық орталықта лифтші болып жұмыс істеген. 31 желтоқсанда ақау шыққан жеделсатыға денесі қыстырылып, көз жұмыпты.
Сот кезінде лифтінің 1981 жылдан бері қолданылып, әбден тозығы жеткені анықталды. Осыдан кейін ескі қондырғыны тоқтатпаған мекеме басшысына өз міндетіне салғырттықпен қарады деген айып тағылды. Дегенмен сот оның кінәсіз екенін мойындады.
"Қылмыстық процессуалдық кодекстің оныншы бабына сүйене отырып, Орал қалалық соты Дильманова Жаннаны кінәсіз деп таныды. Сот оның әрекетінде қылмыс құрамы жоқ екенін анықтады. Жәбірленуші тараптың 15 миллион теңге өтемақы беру туралы талабы қанағаттандырылмайды", — дейді қалалық сот судьясы Айзада Жұмағұлова.
Қорғаушы тергеу кезінде заң бұзылғанын айтады. Өйткені лифті басқа мекемеге тиесілі әрі оның жарамдылығын тексеру директордың міндетіне кірмейді. Сондықтан бұл өлімге оның қатысы жоқ.
"Қылмыс субъектісі жоқ болғандықтан, ақталып отыр. 4 жыл осыны мен жаздым. 4 жыл заңбұзушылыққа мән берген жоқ. Бұл жерде қазір қылмыстың мерзімі ескіруіне байланысты ЖШС жауапқа тартылмай, соның салдарынан қазіргі таңда жәбірленушінің өзі қылмыстық жауапкершілікке біреуді тарту құқығынан айрылып отыр", — дейді қорғаушы Тамара Сәрсенова.
Мәтіннен қате тапсаңыз, бізге жазыңыз
