Алматыда қала құрылысының құжаты – мегаполистің бас жоспарын түзету жобасы бойынша қоғамдық талқылаулар басталды. Бас жоспарды қайта қарауға негіз болған басты себептердің бірі – мемлекет басшысының тау бөктері аймағында құрылыс салуға тыйым салу жөніндегі тапсырмасы, деп хабарлайды KAZ.NUR.KZ қала әкімінің баспасөз қызметіне сілтеме жасап.
Талқылаудың алғашқы күні жобаны таныстырудан басталды. Оған сарапшылар, қоғам өкілдері, бұқаралық ақпарат құралдарының өкілдері мен қала тұрғындары қатысты. Сондай-ақ сегіз ауданның әкімдері тұрғындардың нақты сұрақтарына жауап береді.
Айта кетейік, Бас жоспарды қайта қарауға негіз болған басты себептердің бірі – мемлекет басшысының тау бөктері аймағында құрылыс салуға тыйым салу жөніндегі тапсырмасы. Жаңартылған жобада Талғар тас жолынан, Шығыс айналма авто жолынан (ШААЖ), әл-Фараби даңғылынан, Саин және Жандосов көшелерінен оңтүстікке қарай жаңа көппәтерлі тұрғын үй салуға, сондай-ақ еңісі 15 градустан асатын беткейлерде құрылыс жүргізуге тыйым салу нормасы бекітілген. Бұл шаралар тау бөктерін қорғауға бағытталған.
Құжатта сондай-ақ тұрғын үй құрылысының көлемін қайта бөлу, әлеуметтік инфрақұрылымды — мектептерді, балабақшаларды, медициналық және мәдени мекемелерді дамыту, сондай-ақ 2040 жылға қарай халық санының 3,6 млн адамға дейін өсуі болжамын ескере отырып, жаңа қоғамдық кеңістіктер қалыптастыру көзделген.
Жобада көлік жүйесін дамытуға ерекше назар аударылған. Жаңартылған бас жоспар қоғамдық көлікті дамытудың басымдығын күшейтеді: метро желісін одан әрі кеңейту, ЛРТ-ның алғашқы желісін іске қосу, БРТ жүйесін дамыту және қоғамдық көлікке арналған арнайы жолақтарды көбейту қарастырылған.
Өзгерістердің елеулі бөлігі экология мен көгалдандыру мәселелеріне арналған. Жоба аясында саябақ, сквер, бульвар мен орман-саябақтарын қамтитын бірыңғай жасыл аймақ желісін қалыптастыру жоспарланған. 2040 жылға қарай жасыл желекпен қамту деңгейін халықаралық стандартқа бір адамға кемінде 16 шаршы метрге дейін жеткізу көзделіп отыр.
"Бұған дейін бас жоспарды түзету жобасы танысу үшін Сәулет және қала құрылысы басқармасының ресми ресурстарында жарияланған. Алдағы үш күн ішінде әрбір тұрғын жоба бойынша неғұрлым толық ақпарат ала алады. Қала тұрғындарының пікірі құжатты пысықтау кезінде міндетті түрде ескеріледі. Бұл құжат қолайлы, қауіпсіз, экологиялық тұрғыдан орнықты және заманауи Алматы қаласын қалыптастыруға негіз болуы тиіс", — деп атап өтті Алматыбасжоспар ғылыми-зерттеу институтының бас директоры Асхат Сәдуов.
Мәтіннен қате тапсаңыз, бізге жазыңыз
