Астана әкімі Жеңіс Қасымбек ОКҚ-де өткен брифингте автобустағы жол апатынан соң екі аяғынан айырылған қызға қандай көмек көрсетіліп жатқанын айтып берді, деп жазады KAZ.NUR.KZ.
Қасымбек қыз балаға қажетті медициналық көмек толығымен көрсетілгенін айтып өтті.
"Қарындасымыздың есімі — Алуа. Өкінішке қарай, сондай жайт болды. №1 автопарктің автобусы еді. Медициналық жағынан, басқа жағынан әкімшілік толығымен көмек көрсетті. Автопарк 20 млн теңге көлемінде төлемақы төледі. Қаланың спонсорлары тарапынан қосымша қаражат бөлінді. Уәде берілген пәтерде жөндеу жұмыстары басталып жатыр. Қазірде тұратын үйдің жалдау ақысын әкімшілік төлеп жатыр. Бала қазір мектепте. Мектеп бәрін түсініп, көмегін беріп жатыр", — деді ол.
Естеріңізге сала кетейік, 2 маусымда Астанада жолаушылар автобусы бағанаға соғылып, салдарынан 10 шақты адамның зардап шеккенін, оның бірі ауыр халде екенін жазғанбыз.
Кейін Қоғамдық денсаулық сақтау басқармасы ауруханаға 15 адамның жеткізілгенін, бір адамның аяғына ампутациясы жасалғанын мәлім етті. Кейінірек ауыр жараланған 8 жасар қыз бала екені белгілі болды.
Бұдан бөлек Астана әкімдігі автобус апатынан зардап шеккен қыз баланың отбасына қандай көмек көрсетілетінін хабарлаған.
Мәтіннен қате тапсаңыз, бізге жазыңыз
