Мемлекет басшысының Жапонияға сапары аясында сомасы 3,7 млрд доллардан асатын 60-тан астам екіжақты құжатқа қол қойылды.
Қомақты қаржы салаларға серпін беріп, қос елдің қатынасына қарқын қосАды. Айталық, бүгінге дейін Жапония Қазақстанға 8,5 млрд доллардан асатын инвестиция құйған. Ал былтыр арадағы алыс-беріс 2 млрд долларға жеткен. Бұл жайлы «Орталық Азия – Жапония» диалогының бірінші саммитінде Қасым-Жомарт Тоқаев айтты. Өз сөзінде Президент Қазақстан Жапониямен бірлескен жобаларды табысты жүзеге асыру үшін барлық қажетті жағдайды жасауға, қолайлы инвестициялық орта қалыптастыруға дайын екенін айтты. Сондай-ақ бүгінгі тарихи кездесуді ұйымдастыруға бастамашы болғаны және қонақжайлық танытқаны үшін Жапония премьер-министрі Санаэ Такаичиге алғысын жеткізді. Келелі кездесу Қазақстан, тіпті тұтас Орталық Азия үшін айтулы уақиға деп ойлаймын, — деді қазақ басшысы.
