Токио қаласында Мемлекет басшысы Қасым-Жомарт Тоқаевтың Жапонияға ресми сапары аясында жалпы құны 3,7 миллиард доллардан асатын коммерциялық келісімдерге қол қою жоспарланып отыр.
Президенттің көмекшісі – Баспасөз хатшысы Руслан Желдібайдың хабарлауынша, сапар барысында Қазақстан Президенті жапониялық ірі бизнес өкілдерімен бірқатар кездесулер өткізеді. Нәтижесінде 40-тан астам құжатқа қол қою көзделген.
Келісімдер энергетика, жаңартылатын энергия көздері, цифрландыру, тау-кен өнеркәсібі және көлік салаларын қамтиды. Қазақстан тарапынан құжаттарға «Самұрық-Қазына», KEGOC, «Қазатомөнеркәсіп», «Тау-кен Самұрық», «Қазпошта» және «Қазақстан темір жолы» компаниялары қол қояды. Ал жапон тарапынан Marubeni, MUFG Bank, Mitsubishi Heavy Industries, Hitachi Energy, Toshiba, JOGMEC, Kansai Electric Power және RIKEN KOGYO компанияларының өкілдері қатысады.
Сонымен қатар сапар аясында өзге де ресми келіссөздер мен іскерлік кездесулер өткізу жоспарланған.
Айта кетейік, Қасым-Жомарт Тоқаев кеше Жапонияға ресми сапармен барды.
