Бұл туралы Астана халықаралық форумы аясында Ғылым және жоғары білім министрі Саясат Нұрбек мәлімдеді.
Ал, биыл оқу жылында елімізге 31 500 шетелдік студент келген, деп жазады inbusiness.kz сайты Қазақпарт агенттігіне сілтеме жасап.
– Соңғы 3 жылдың ішінде елімізде ең мықты 38 шетелдік университеттің филиалы ашылды. Осы жұмыстың арқасында 2 тарихи рекорд болды. Биыл оқу жылында Қазақстанға 31 500 шетелдік студент келді. Бұл – тарихи рекорд. Оның үстіне тарихымызда тұңғыш рет ТМД елдерінен студенттер көбірек келіп отыр. Ресейден 3 мыңнан астам, Қытайдан 2 мыңнан астам, Пәкістан мен Үндістаннан 12 500, Моңғолия, Түркия, Әзербайжан, Нигерия, Оңтүстік Африкадан студенттер келді. Көші-қон сальдосы ауысып жатыр, – деді министр.
Министр шетелде білім алуға кететін қазақ жастарының да көп екенін жасырмады.
– Бірақ шетелдік университеттердің филиалдарын ашу арқылы осы көші-қонды кері бағыттау мақсатын қойдық. Қазірдің өзінде 38 филиалда 10 мыңнан астам студент білім алып жатыр. Демек, Қазақстан талапкерлерге ең мықты британдық, америкалық, неміс, француз, кәріс, қытай сынды ең дамыған елдердің білімін алуға мүмкіндік береді, – деді Саясат Нұрбек.
Жалпы министрліктің басты мақсаты – Қазақстанды үлкен академиялық хаб ретінде қалыптастыру. Екінші үлкен мақсат ол – біздің өңірлік университеттерімізді халықаралық серіктестіктерді қолданып, шетелдік зерттеуші мықты университеттерге айналдыру. Үшінші мақсат – ғылымды дамыту.
Айта кетейік, бүгін комиссияның шешімімен "Болашақ" стипендиясы иегерлерінің тізімі жарияланды.
