Тахауи Ахтанов атындағы Ақтөбе облыстық драма театрының әртістері Францияға гастрольдік сапармен барып, Парижде «Қобыланды батыр» қойылымын сахналады. Хореографиялық элементтермен, ерекше көз тартарлық костюмдермен, домбыра мен қобыздың дауысымен көркемделген қойылым көрермендерге ерекше көңіл-күй сыйлады. ЮНЕСКО жанындағы Қазақстанның Тұрақты өкілі Асқар Әбдірахманов пен Франциядағы Қазақстанның Төтенше және өкілетті елшісі Гүлсара Арыстанқұлова қойылымға арнайы келіп қатысты, деп хабарлайды Egemen.kz.
Қобыланды рөлін сомдаған Әділет Мұхтар елдің тағдыры талқыға түскен кезеңдегі мінезі, ішкі болмысы, көңіл-күйі, жеңісі мен қателескен тұстары арқылы ортағасырлық батыр табиғатын барынша ашуға тырысқан. Оның жанындағы –Тоқтарбай (Кеңес Кемалбаев), Аналық (Айгүл Оразалина), Естеміс (Еламан Досжанов), Қарлыға (Ажар Жәрденбекқызы), Қарлығаш (Фатима Бердібекова), Құртқа (Аружан Базарбаева) Қобыланды бейнесін толықтырып тұр. Сахнадағы Алшағыр, Көбікті, Көклан, Қараман мен Қазан образдары да әр қырынан сомдалған. Сол заманның үнін жеткізуші ақын (Абзал Құдайбергенов) арқылы қойылымның идеясы мен композициясы тұтасқан.
Бұл Париж көрермендеріне ортағасырлық қыпшақ даласы кейіпкерлерінің табиғаты мен болмысын, мінезі мен өмір салтын түсінуге тез жол ашады. Спектакльдің қоюшы режиссёрі – Дина Жұмабаева, қоюшы суретшісі Лилия Хисматуллина. Кейіпкерлер киімдері, қимыл қозғалыстары қобыз сарынымен үндесіп, Қобыланды өмір сүрген замандағы дала заңына бағынған қоғамның өмір сүру салтын көркемдейді.
«Т. Ахтанов атындағы облыстық драма театры әртістерінің сапары Ақтөбе облысы әкімдігінің қолдауымен іске асырылды. Әлемдік сахнада өнер көрсету біздің әртістерімізге үлкен тәжірибе болды. Айта кету керек, билеттер алдын ала тез сатылып кетті. Адам көп жиналды. Қойылым өзін өзі ақтады», дейді облыстық мәдениет басқармасының басшысы Алтынай Юнисова.
Ақтөбе облысы
