Астанада «AMANAT» партиясы «Жастар Рухы» жастар қанатының «Рухтастар» республикалық сыйлығы табысталды.
Бесінші рет ұйымдастырылған шарада қоғамдық бастамаларға үлес қосқан белсенді жастар марапатталды. Биыл байқауға 18 бен 35 жас аралығындағы үміткерлерден 500-ден астам өтінім келіп түскен. Байқау бірнеше кезеңнен тұрды. 25 қарашадан 3 желтоқсанға дейін өтінімдер «Жастар Рухының» ресми сайтында қабылданып, кейін республикалық комиссиясының қарауына жіберілген. Осылайша, жыл батыры -«Қайсар», жас ғалым — «Нұрлы ақыл», еңбек адамы — «Ыстық қайрат», жыл еріктісі — «Жылы жүрек» аталымдары бойынша жылдың үздіктері анықталды. Сонымен бірге «Жылдың әлеуметтік жобасы», «Белсенді рухтас» сияқты аталымдар бойынша үздіктер марапатталды.
Сексенбек Баймұрат, «Рухтастар» сыйлығының иегері:
- «Белсенді рухтас» номинациясын алдым. Өте қуаныштымын. Көкшетау қаласының белсендісімін. Менің жеңісім қасымдағы әріптестерім, активистердің жеңісі деп есептеймін.
Ақерке Искандерова, «AMANAT» партиясы «Жастар Рухы» ЖҚ төрағасы:
- 500-ге жуық өтінім түсіп, солардың арасында үздіктер анықталды. Әрине, «Жастар Рухының» қызметін бір жыл бойы атқарып келген жастар үшін де арнайы номинациялар бар. Ол бойынша 20 облыстан «үздік рухтастарымыз» анықталып, сонымен қатар «үздік бөлімше» марапатталады.
