Қазақстанның дайын өнім экспорты Өзбекстанмен салыстырғанда бірнеше есе жоғары. Бұл туралы өзбек экономисі, Экономикалық дамуға жәрдемдесу орталығының директоры Юлий Юсупов «Seredin» подкастында айтты, деп хабарлайды Egemen.kz.
Экономист Қазақстан мен Өзбекстан экономикаларын жиі салыстыру мәселесіне тоқталып, экспорт құрылымы мен дайын өнім өндірісінің көлеміне назар аударды. Оның айтуынша, Қазақстанда ел экономикасы мен мемлекеттік шығыстарға қатысты сын жиі айтылғанымен, объективті көрсеткіштер елдің әлдеқайда тұрақты позицияда екенін көрсетеді.
«Егер сауда айналымына қарасаңыз, Қазақстаннан Өзбекстанға экспорт көлемі бізден Қазақстанға баратын экспорттан айтарлықтай жоғары. Демек, қазақстандықтардың сататын өнімі бар», деді Юлий Юсупов.
Экономист бұл айырмашылықтар көбіне табиғи ресурстарға байланысты екенін атап өтті. Алайда соған қарамастан, Қазақстан өңделген, дайын өнім экспорты бойынша абсолютті көрсеткіштерде жоғары нәтиже көрсетіп отыр.
«Экспорт құрылымын салыстырсақ, Қазақстанда табиғи ресурстардың үлесі жоғары екені анық. Бірақ соған қарамастан, егер дайын өнім экспортын абсолютті мәнде, яғни миллиардтаған доллармен есептесек, Қазақстанның дайын өнім экспорты Өзбекстаннан айтарлықтай, бірнеше есе артық», деді ол.
Юсуповтың айтуынша, бұл жағдай Қазақстанның шикізат экспортына тәуелділігі жоғары болғанына және Өзбекстан халқының саны Қазақстанға қарағанда шамамен екі есе көп екеніне қарамастан жүзеге асып отыр.
«Біз Қазақстанға қарағанда шикізат экспортына онша тәуелді емеспіз. Соған қарамастан, Қазақстан дайын өнімді бірнеше есе көп өндіреді», деп түйіндеді экономист.
Подкаст барысында сондай-ақ қоғамдағы экономикалық жағдайға қатысты қабылдау нақты макроэкономикалық көрсеткіштермен әрдайым сәйкес келе бермейтіні, әсіресе Орталық Азия елдерін салыстыру кезінде бұл анық байқалатыны айтылды.
