Білім ордасы құрылыс жұмыстарының басталғаны туралы мемлекеттік сәулет-құрылыс бақылау басқармасына ескертпеген.
Тараздағы университетке мемлекеттік органның хабарынсыз құрылыс салғаны үшін айыппұл салынды, деп жазады inbusiness.kz сайты.
Тараз қаласының әкімшілік құқық бұзушылық жөніндегі мамандандырылған соты "Міндетті хабарламаны жібермеу" бабы бойынша "Т" университетіне қатысты істі қарады.
Істі қарау үшін тексеру материалдары негіз болды. Оның барысында университет құрылыс жұмыстарының басталғаны туралы мемлекеттік сәулет-құрылыс бақылауын хабардар етпей, қолданыстағы ғимаратқа екі қабатты жапсаржай салғаны анықталды.
Сотта университет өкілі аталған фактілерді растап, кінәсін мойындады.
Құқық бұзушылықтың сипатын, мүліктік жағдайын және жеңілдететін мән-жайларды ескере отырып, сот айыппұл сомасын 30%-ға азайтты.
Сот қаулысымен мекеме ӘҚБтК-нің 463-бабының 1-бөлігі бойынша кінәлі деп танылды және оған 68 мың теңге көлемінде айыппұл тағайындалды.
Қаулы заңды күшіне енген жоқ.
