Төрт ауыл жаңа ауыз су жүйесіне қосылды.
Жамбыл облысының ауылдарын сапалы ауыз сумен қамтамасыз етуге арнаулы мемлекеттік қорға қайтарылған активтер есебінен 15,4 млрд теңге бөлінді, деп хабарлады үкіметтің баспасөз қызметі.
Қазіргі уақытта өңірде сумен жабдықтау бойынша 12 жоба арнаулы мемлекеттік қор қаражаты есебінен іске асырылып жатыр. Оның ішінде төрт нысан толық пайдалануға берілген, ал қалған сегіз жобада құрылыс жұмыстары жалғасып, жыл соңына дейін аяқтау жоспарланған.
Үкімет мәліметінше, алғашқы нәтижелер айқын:
- Жамбыл ауданындағы Қызылшарық, Жаңаөткел және Жұма ауылдары толық ауыз сумен қамтылды;
- 300-ден астам тұрғыны бар Талас ауданының Қараой ауылында алғаш рет орталықтандырылған су құбыры іске қосылды.
Оқи отырыңыз: Үкімет: Алдағы вегетацияда оңтүстікте су жетіспеуі мүмкін
"Аталған жобаның жалпы құны 933,4 млн теңге, оның 106,7 млн теңгесі тікелей арнаулы мемлекеттік қордан бөлінген. Жыл соңына дейін тапсырылуы тиіс 8 нысан облыстың шалғай аймақтарында орналасқан. Құрылыс жұмыстары белгіленген жоспарға сай жүріп жатыр", – делінген хабарламада.
