Қазақстан мен Иран басшылары стратегиялық серіктестікті тереңдету мәселелерін талқылады.
Қазақстан Президенті Қасым-Жомарт Тоқаев пен Иран Президенті Масуд Пезешкиан Астана қаласында ресми келіссөздер жүргізді. Бұл – Иран басшысының елімізге жасаған алғашқы ресми сапары. Келіссөз барысында тараптар саяси, экономикалық және мәдени-гуманитарлық ынтымақтастықты кеңейту мәселелерін талқылады.
Кездесудің басында Қасым-Жомарт Тоқаев Иран Президентін құттықтап, екі ел арасындағы тарихи байланыстарды жоғары бағалады. Президенттің айтуынша, қос тарап арасында ешқандай шешілмеген мәселе жоқ, сондықтан екі ел қатынасының болашағы зор. Ол биылғы он айда екіжақты сауда көлемі 40 пайызға артқанын айтып, сауда-экономикалық қарым-қатынасты одан әрі дамыту қажеттігін жеткізді.
"Аса құрметті Президент мырза, Қазақстанға қош келдіңіз! Елімізге алғаш рет ресми сапармен келіп отырсыз. Қазақта "Көрші тату болса – құт" деген жақсы сөз бар. Екі елді қарт Каспий байланыстырады. Қазақстан Иранды жақын әрі бауырлас көрші, Орта Шығыстағы сенімді серіктес деп біледі. Біз қашанда Иранға тілеулеспіз. Қиындықтарға қарамастан қарым-қатынасты үзген жоқпыз. Қазақ-иран байланысының тамыры тереңде жатыр. Қос халықтың тарихы – ортақ, салт-дәстүрі мен мәдениеті – ұқсас. Ықпалдастығымыз ғасырлар бойы жалғасып келе жатыр. Қазақ елі әрдайым Иранды қолдайды, арамызда ешқандай түйткіл, иә болмаса, шешілмеген мәселе жоқ. Сондықтан екі ел арасындағы қарым-қатынастың келешегі зор. Қазақстан мен Иран арасында сындарлы саяси диалог қалыптасқан, үкіметтеріміз бірлесіп жұмыс істейді. Өзара уағдаластықтарымыз орындалуда, парламентаралық байланыс та нығайып келеді. Сауда-экономика саласындағы алыс-беріс жылдан жылға күшейіп келеді. Биылғы 10 айда көрсеткіштер былтырғымен салыстырғанда 40 пайызға артты. Бұл – әрине, өте жақсы жетістік. Бірақ осы қарқынды тоқтатпай, өзара сауда көлемін ұлғайта түсу қажет", – деді Қасым-Жомарт Тоқаев.
Оқи отырыңыз: Ауыл әкімінің билігін күшейту үшін оларға қандай мәртебе беру қажет? Сарапшылар пікірі
Өз кезегінде Масуд Пезешкиан Қазақстанға сапарының маңыздылығын атап өтті. Иран басшысы екі елдің саяси-экономикалық, мәдени-гуманитарлық және қауіпсіздік салаларындағы әлеуеті зор екенін ерекше екеніне тоқталды.
"Тарихы терең, мәдениеті бай бауырлас, достас Қазақстанға келгеніме қуаныштымын. Көптеген бағытта ынтымақтастығымыз қарқынды түрде дамып келеді. Үкіметтеріміз нәтижелі жұмыс атқаруда. Саяси-экономикалық, мәдени-гуманитарлық және қауіпсіздік салаларындағы ықпалдастықтың әлеуеті зор деп ойлаймын", – деді Иран Президенті.
Келіссөз соңында тараптар стратегиялық серіктестікті нығайтуға бағытталған ортақ ұстанымдарын растады. Үкіметтер арасындағы тиімді байланыс пен тұрақты диалог алдағы кезеңде де жалғасатын болды.
