Тұрғындардың өзара байланысы үшін бірыңғай Super App қосымшасы іске қосылады.
Алматы 2030 жылға қарай жасанды интеллектке негізделген "ақылды қала" тұжырымдамасы негізінде заманауи басқару моделіне көшеді. Бұл туралы Алматы қаласы Экономика және қаржы басқармасының басшысы Бауыржан Құдайбергенов мәслихаттың кезектен тыс сессиясында айтты, деп хабарлайды inbusiness.kz сайты.
"Цифрландыру – Алматының орнықты дамуының басты бағыттарының бірі. 2030 жылға қарай қала жасанды интеллектке негізделген "ақылды қала" тұжырымдамасы негізінде заманауи басқару моделіне көшеді. Осы мақсатты үдерістерді дәл модельдеуге инженерлік желілерге түсетін жүктемені болжауға және апаттардан келетін шығынды 20 пайызға азайтуға мүмкіндік беретін қаланың цифрлық егізі жасалады. Сондай-ақ қозғалысты басқарудың зияткерлік көлік жүйелері, қоғамдық көлік бағыттарын ақылды жоспарлау жүйесі енгізіледі", – деді Бауыржан Құдайбергенов.
Тұрғындардың өзара байланысы үшін бірыңғай Super App қосымшасы іске қосылады. Өтініштерге жауап беру уақыты 25 пайызға қысқарып, қала халқының кемінде 80 пайызы төтенше жағдайлар мен маңызды қалалық ақпарат бойынша дербес хабардар етілетіні де айтылды.
"Қауіпсіздік саласында әлеуметтік нысандар 100% кешенді қауіпсіздік жүйесімен қамтылады. 2030 жылға қарай 100 мың бейнебақылау және 4,5 мың жол қозғалысын бақылау камерасы Бірыңғай мониторинг жүйесіне қосылады. Бұл шаралар 2030 жылға қарай қылмыс деңгейін әр 10 мың тұрғынға шаққанда 140 жағдайға дейін төмендетуге мүмкіндік береді", – деп жалғастырды басқарма басшысы.
Алматы үшін төтенше жағдайларға дайындық мәселесі өзекті болып отыр.
"Алдағы 5 жыл ішінде энергия, су, жылумен қамтамасыз ету жүйелерінің кемінде 150 маңызды нысанына, 400 әлеуметтік объектіге және 200 көпқабатты тұрғын үйге сейсмикалық күшейту жұмыстары жүргізіледі. 2030 жылға дейін 15 жаңа өрт депосы салынып, 5 қолданыстағы депо жаңғыртылады, сондай-ақ қосымша 39 бірлік құтқару және өртке қарсы техника сатып алу жоспарланып отыр", – деді Алматы қаласы Экономика және қаржы басқармасының басшысы.
Айта кету керек, бұған дейін Алматы экономикасында шағын және орта бизнес үлесі артатынын жазғанбыз. Алматы елдің жалпы ішкі өнімінің 23%-ын қалыптастырады. 2030 жылға қарай оңтүстік мегаполиске келетін туристер саны қаншаға артатыны белгілі болды. Алматыда 2030 жылға дейін 11 медициналық нысан бой көтереді.
