Мәжіліс кулуарында депутат Асхат Аймағамбетов мектеп оқушыларына смартфон қолдануға қойылатын шектеулерге қатысты пікірін білдірді. Оның айтуынша, балалар смартфондардың кесірінен айналасын танудан қалды, деп хабарлайды Egemen.kz.
«Балалардың бос уақытын тиімді өткізу үшін біз бұдан да көп шара қабылдауымыз қажет. Жай ғана «тыйым салайық» деп айту жеткіліксіз. Балаға қауіп төндіретін аты танымал ойындар бар. АҚШ-та, Англияда да көптеген фактілер тіркелген. Мен ол ойындардың атауын айтқым келмейді, бірақ соның кесірінен педофилдер балалармен кездесулер ұйымдастырған жағдайлар болды, тіпті зорлау фактілері де тіркелді. Суицидке апарған оқиғалар да бар. Сондықтан бұл мәселеге рационалды қарау керек», деді ол.
Депутаттың айтуынша, ең алдымен кешенді жүйелі тәсіл қажет.
«Бұл, ең алдымен, мектептерде смартфонды шектеу. Бес және тоғыз жастағы балалар күні бойы TikTok қарап, видеоларды сырғытып отыра алмайды. Бұл олардың денсаулығына кері әсер етеді. Балалар үшін үйірмелер мен секциялардың санын арттыру да маңызды», деді Аймағамбетов.
Ол сондай-ақ елде ойын автоматтарына тыйым салынғанына қарамастан, баланың өзімен бірге қалтасына «сол автоматтың кішірейтілген нұсқасын» алып жүретінін атап өтті.
«Бұл – тәуелділік тудырады. Сондықтан кибергигиена, цифрлық сауаттылық, кітап оқуға баулу, бір-бірімен тілдесу – жасанды интеллект дәуірінде аса маңызды. Мектеп тек сабақ оқитын орын емес, ол – әлеуметтену алаңы. Үзіліс кезінде балалар бір-бірімен сөйлесуі керек. Бірақ біз не көріп жүрміз? Үзілісте әр бала телефон шығарады да, қарым-қатынас, өзара байланыс деген болмай қалады», деп қосты депутат.
Еске салайық, өткен аптада Қазақстанда 16 жасқа дейінгі балаларға әлеуметтік желілерді қолдануға тыйым салу туралы заң жобасы қоғамдық талқылауға шығарылған еді. Жоба талқылауы 29 желтоқсанға дейін жалғасады.
Сондай-ақ 16 жасқа дейінгі балалардың әлеуметтік желілерге қолжетімділігін реттейтін заң жобасы да әзірленген еді.
