Туристік пойыз тоғыз вагоннан тұрады.
Бүгін Қытайдың Сиань қаласынан "Сиань–Алматы" бағыты бойынша алғашқы халықаралық туристік пойыз жолға шықты, деп хабарлайды "ҚТЖ" ҰК" АҚ баспасөз қызметі.
Пойыз Үрімжі қаласы арқылы өтіп, халықаралық шекаралық Қорғас өткеліне тоқтайды. Бұл жерде пойыздың дөңгелек жұптары ауыстырылады. Одан кейін пойыз Алтынкөл станциясы арқылы Алматы қаласына жетеді.
"Бұл жоба Қазақстан мен Қытай арасындағы мәдени байланыстарды тереңдетіп, туризм саласындағы серіктестікті дамытуға бағытталған. Сапар барысында қытайлық қонақтар еліміздің тарихи-мәдени мұрасымен жақынырақ танысып, болашақта жаңа бірлескен жобалардың бастамасына негіз қаланады деп сенеміз", – деді "ҚТЖ" ҰК" АҚ басқарма төрағасының орынбасары Әнуар Ахметжанов.
Оқи отырыңыз: ҚТЖ жазда Алакөлге қосымша пойыздарды іске қосады
Туристік пойыз тоғыз вагоннан тұрады және жолаушыларға барынша қолайлы жағдай жасау үшін заманауи жабдықтармен қамтамасыз етілген.
"Туристік топ құрамында бизнес өкілдері, ғалымдар, актёрлармен спортшыларды қоса алғанда 246 адам бар. Қытайлық туристер бес күн бойы Қазақстанның оңтүстік астанасының тарихи және мәдени мұрасымен танысып, негізгі көрнекті орындарды аралайды, сонымен қатар қабылдаушы тарап ұйымдастырған мәдени және іскерлік іс-шараларға қатысады", – делінген хабарламада.
