Мәжіліс депутаты Олжас Құспеков премьер-министрдің орынбасары — ұлттық экономика министрі Серік Жұманғаринге жолдаған сауалында көліктердің алдыңғы бүйір әйнектерін ақылы қараңғылауды заңдастыру арқылы бюджетті қанша қаржымен толықтыруға болатынын айтты, деп хабарлайды Zakon.kz.
Депутат мұндайда қоғамның сұранысы қамтамасыз етіліп қана қоймай, бюджеттің де ұпайы салық тыс формада түгенделетінін айтады.
"Ұлттық статистика бюросының ресми мәліметтері бойынша 2025 жылғы 1 мамырға дейін елімізде 6 млн 176 мың көлік тіркелген, оның 86,5%-ы — жеңіл көлік. Автопарктің 5%-і қамтылған және рұқсаттың орташа құны 50 АЕК болса да, бюджетке түсетін түсім көлемі жылына 50 млрд теңгеден асуы мүмкін. Бұл қаражат инфрақұрылымды қалпына келтіруге және дамытуға, тасжолдарды жөндеуге және ұстауға пайдаланылуы мүмкін", — дейді ол.
Ал Кеден одағының "Доңғалақты көлік құралдарының қауіпсіздігі туралы" техникалық регламентіне сәйкес кем дегенде 70% жарық өткізген жағдайда алдыңғы бүйір әйнектерде тонировка қолдануға рұқсат етіледі.
"Бұл талаптар тонировканы заңдастырудың ұлттық тәсілінің негізін қалауы керек. Ақылы мемлекеттік қызметтерді пайдаланудың табысты тәжірибесі бар. Мәселен 2024 жылы бюджет VIP-мемлекеттік нөмірлерді сатудан 15,8 млрд теңге тапты, бұл осындай шешімдердің тиімділігін растайды", — деді Олжас Құспеков.
Депутат әлемдік тәжірибені де мысал ретінде келтірді.
"Халықаралық тәжірибе заңдастырылған ақылы тонировканың тиімділігін растайды. Мәселен Қырғыз Республикасында тонировкаға рұқсат беруден 2024 жылы бюджетке шамамен 4 млрд теңге түсті. Өзбекстанда жарық өткізуге рұқсат 70%-дан бастап беріледі. БАӘ мен Оңтүстік Кореяда техникалық талаптар мен баж салығын төлеу кезінде алдыңғы әйнектерді 50% және 40% дейін бояуға рұқсат етіледі", — деді ол.
Олжас Құспеков Үкіметке мынадай ұсыныс жолдап отыр:
"Уәкілетті органдарға рұқсаттарды ресімдеп, бюджетке пайда түсіру үшін кем дегенде 70% жарық өткізген жағдайда көліктердің алдыңғы бүйір әйнегін ақылы бояуды заңдастыру тетігін әзірлеу керек".
Айта кетсек, 2025 жылғы 28 мамырдағы палатаның жалпы отырысында Мәжіліс депутаттары Қазақстанда алғаш рет адамды аңдығаны үшін жаза енгізетін және қыз алып қашу бабын Қылмыстық кодексте жаңғыртатын түзетулерді екінші оқылымда мақұлдады.
