Депутаттар енгізген түзетулер салыстырмалы кестеге енгізілді.
Сенаттың жалпы отырысында "2026-2028 жылдарға арналған республикалық бюджет туралы" заң Мәжіліске қайтарылды, деп хабарлайды inbusiness.kz сайты.
"2026–2028 жылдарға арналған республикалық бюджетті қалыптастыру – жаңа Бюджет кодексі аясында жүзеге асырылатын, тұрақтылыққа, теңгерімділікке және дамуға басымдық беретін күрделі әрі жауапты процесс ретінде сипатталады. Олардың қаншалықты іске асырылатынын және қаншалықты талапқа сай болғанын, оның кейбір бағыттары арқылы қарастырайық. Экономика заңдылығына сәйкес үш жылдық болжам, 2026–2028 жылдардың бюджетімен бірге теңгерімді болуы керек еді. Яғни Болжам экономика салаларының даму жоспарларын, олардың бюджеттен қаржыландырылуымен өзара байланыста көрсетуі тиіс болатын", – деді сенатор Сұлтанбек Мәкежанов.
Оның сөзінше, аталмыш үш жылдық болжамның 2029 жылға дейінгі Ұлттық даму жоспарымен егжей-тегжейлі байланысы нақты емес екені анықталды.
Мысалы, 2026–2028 жылдары ауыл шаруашылығының орташа жылдық өсімі 3,9%, құрылыста 11%, саудада 6,7% және т.б. салаларда өсу болады деп көрсетілген. Бірақ бұл өсімге Ұлттық жоспар деректерімен байланыстыра отырып талдау жасалмаған. Осындай жағдай экономиканың көптеген басқа салалары бойынша да орын алуда, деп есептейді депутат.
"Төменгі деңгейдегі даму жоспарларының нысаналы индикаторлары мен міндеттері бойынша да осындай жағдайлар орын алған. Бұл көрсеткіштер Ұлттық жоспардың мақсатты индикаторларына және жоғары деңгейдегі басқа да құжаттарға қол жеткізуге толық бағытталмаған.Мысалы, Өнеркәсіп және құрылыс министрлігінің даму жоспарында тұрғын үй қорын реновациялау, сумен жабдықтау және су бұру желілерінің 4,6 мыңға жуық шақырымын реконструкциялау жөніндегі іс-шаралары мүлдем қарастырылмаған, мұндай мысалдар басқа салаларда да бар", – деді Сұлтанбек Мәкежанов.
Сенат депутаты мұндай жайттар экономиканың даму барысын қадағалап, барлық құрылымдардың деңгейінің елдік мақсаттарға қосқан үлесін бағалауға мүмкіндік бермейді деп отыр.
Заңды талқылау барысында тұрақты комитеттер мен депутаттардан 77 ұсыныс келіп түскен, оның 76-сы қолдау тауып, салыстырмалы кестеге енгізілді.
"Үш жылдық кезеңге жалпы 91 млрд теңге сомасына ұсыныстар қолдау тапты, соның ішінде 2026 жылға – 50 млрд теңге. Шығыстардың ұлғаюы Үкімет резервін қайта бөлу және борышқа қызмет көрсету есебінен жүзеге асырылады. Қаржы және бюджет комитеті салыстырмалы кестені қарауға және "2026-2028 жылдарға арналған республикалық бюджет туралы" заңға енгізілетін өзгерістер мен толықтыруларды Мәжіліске жіберуді ұсынады", – деп түсіндірді сенатор Сұлтанбек Мәкежанов.
Айта кету керек, бұған дейін Сенат жалпы сипаттағы трансферттердің көлемі туралы заңды Мәжіліске қайтарғанын жазғанбыз.
