Нью-Йорк (The New York Times дерегіне сүйенсек): АҚШ барлау қызметі Израильдің Ирандағы ядролық нысандарға соққы жасауға небәрі жеті сағат ішінде дайын екенін хабарлады. Бұл ақпарат Таяу Шығысқа АҚШ президенті Дональд Трамптың сапары қарсаңында жарияланды, деп жазады Egemen.kz.
Израиль билігі Вашингтонға Иранның ядролық бағдарламасына қатысты алаңдаушылық білдіріп, шабуыл жасауға дайын екендерін жеткізген. Тель-Авив Тегеранның уран байыту жұмыстарын толық тоқтатып, ядролық инфрақұрылымын жоюды талап етіп отыр.
Израиль тарапының алаңдауына себеп Трамп әкімшілігінің Иранмен жаңа ядролық келісім жасасуға деген ұмтылысы. Израиль мұндай келісім Иранға ядролық қаруға қол жеткізу жолын жаба алмайды деп есептейді.
Осыған орай, 23 мамыр күні Италияның Рим қаласында Иран мен АҚШ арасындағы ядролық келіссөздердің бесінші кезеңі өтті. Бұл кездесуге араағайын ретінде Оман мемлекеті делдалдық еткен. Оман сыртқы істер министрі Бадр аль-Бусаиди келіссөздерде «нақты, бірақ толық емес прогресс» бар екенін атап өтті.
Иран сыртқы істер министрінің орынбасары Аббас Арагчи алдағы кездесулерде Тегеран мен Вашингтон өзара оң нәтижелерге қол жеткізуді мақсат етіп отырғанын мәлімдеді.
The Axios порталының мәліметінше, Дональд Трамп Израиль премьер-министрі Биньямин Нетаньяхуға Иранмен келіссөздерге кедергі келтіретін кез келген әскери әрекеттен бас тартуды сұраған. Дегенмен, Израиль тарапы өзінің ұлттық қауіпсіздігіне төнетін қауіпке қарсы тұруға дайын екенін білдіріп отыр.
