Қазақстанда алғаш рет іске қосылған Alem.Cloud ұлттық суперкомпьютері халықаралық TOP500 рейтингінде 86-орынға көтеріліп, әлемдегі ең қуатты есептеу жүйелерінің қатарына кірді, деп хабарлайды Egemen.kz.
Мемлекет басшысының тапсырмасы бойынша Alem.Cloud суперкомпьютерлік кластері Жасанды интеллект және цифрлық даму министрлігіне қарасты «Ұлттық ақпараттық технологиялар» АҚ инфрақұрылымы негізінде құрылған. Бұл инфрақұрылым жасанды интеллект, үлкен деректерді талдау бағыттарындағы жобаларды іске асыруға арналған.
Кластердің архитектурасы жоғары тығыздықтағы бірыңғай GPU-кешеніне біріктірілген 64 HPE Cray серверінің базасында іске қосылған. Әрбір есептеу торабы жоғары жылдамдықты қамтамасыз ететін NVIDIA H200-бен жабдықталған.
Жобаны жүзеге асыруда Біріккен Араб Әмірліктерінің G42 тобына кіретін Presight компаниясы маңызды рөл атқарды. Халықаралық серіктестер Қазақстандағы AI экожүйесін дамытуға арналған озық тәжірибелерді енгізіп, жоғары өнімді есептеу кластерін жобалау барысында кешенді техникалық қолдау көрсетті.
«Жүйе жоғары петафлопс диапазонында өнімділікті қамтамасыз етеді және Қазақстан мен Орталық Азия аймағындағы ең қуатты есептеу платформасы болып саналады. Суперкомпьютер бағдарламалық жасақтамасы SUSE Harvester (виртуализация және таратылған есептеулерге арналған жаңа буын гипервизоры), SUSE Rancher (Kubernetes пен AI-жүктемелерін орталықтан басқару платформасы) технологияларын қамтиды. Кластердің қауіпсіздігін қамтамасыз ету үшін SUSE NeuVector (контейнерлік қауіпсіздік, желілік бақылау және рантайм-қорғау жүйесі), Palo Alto Networks желілік сегментация және киберқауіпсіздік шешімдері, сондай-ақ Thales криптографиялық және аппараттық шифрлау құралдары қолданылады», делінген хабарламада.
«ҰАТ» АҚ мамандары халықаралық серіктестермен бірлесіп, HPL (Linpack) әдістемесі бойынша кешенді тестілеу жүргізді. Сынақтар жүйенің нақты есептеу мүмкіндіктерін дәлелдеп, TOP500 рейтингіне тіркеуге дайын екенін көрсетті.
