Инфекциялық ауруханаға күн сайын 5 адам түсіп жатыр.
Ақтөбеде "Гонконг тұмауы" деп аталатын H3N2 штаммы анықталды. Кейінгі күндері тұрғындар дене қызуының көтерілуі, жөтел және тұмауға ұқсас белгілердің күшеюіне алаңдаушылық білдіріп отыр.
"Диапазон" басылымы жазғандай, ақтөбеліктер арасында бұл жаңа вирус болуы мүмкін деген күдік тараған.
"Айналамда көп адам ауырып жүр, әсіресе балаларға ауыр тиіп жатыр. Температура 38 градустан да жоғары көтеріледі, жөтел, әлсіздік байқалады. Біздің балабақшада дүйсенбі күні топтағы балалардың жартысынан көбі келмей қалды. Ересектер де жаппай жөтеліп жүр. Бұл – Гонконг тұмауы деп оқыдым. Расымен бар ма? Ауруханаға көп адам түсіп жатыр дейді", – деп жазды ақтөбелік Альбина.
Санитариялық-эпидемиологиялық бақылау департаменті өңірде H3N2 тұмауының анықталғанын растады. Алайда мамандар оның жаңа вирус емес екенін атап өтті.
Оқи отырыңыз: Мектептерде оқушылар арасында тұмау артса, оқу процесі онлайн режимге өтеді
"Қазір А типті тұмаудың (H3N2) – яғни "Гонконг" вирусының жағдайлары тіркелді. Бұл – жыл сайын күз-қыс маусымында айналымда жүретін, бұрыннан белгілі штамм. Жаңа вирус емес, маусымдық тұмаудың бір тармағы", – деді департамент басшысы Райхан Қойшанова.
Облыстық денсаулық сақтау басқармасының мәліметінше, инфекциялық стационарға тәулігіне шамамен бес науқас жатқызылады. Аурухананың қабылдау бөлімі тәулігіне 20 адамға қызмет көрсетіп отыр.
