Жаңа өзгерістер 1 айдан соң қолданысқа енеді.
Алдағы уақытта құқық қорғау органдарының қызметкерлеріне және әскери қызметшілерге тұрғын үй төлемдерін жеке депозиттік шотқа аударуға тыйым салынбақ, деп хабарлайды inbusiness.kz сайты.
Сондай-ақ, тұрғын үй төлемдерінің шектік сомасы 90 шаршы метрге дейінгі тұрғын үй алаңының көлемімен есептеледі деген мәлімет бар. Әрі жалға алу төлемдері 8 жылға дейін ғана берілмек. Осы орайда, мүлікті қызметкердің өзінің немесе оның жұбайының жақын туыстарынан жалға алуға тыйым салынады. Мұның бәрі саладағы кейбір жөнсіздіктерді ретке келтіруге, айтарлықтай сомадағы қаржыны үнемдеуге бағытталған.
Сонымен қатар, тұрғын үйді жалдау шартын уәкілетті органда міндетті мемлекеттік тіркеуден өткізуі шарт. Ал ай сайынғы тұрғын үй төлемдерінің көлемі ипотекалық негізгі борыш сомасынан аспайтын мөлшерде ғана беріледі.
Енді ерлі-зайыптылардың екеуі де қызметкер немесе әскери қызметші болған жағдайда, тұрғын үй төлемдері оның біреуіне ғана таңдау бойынша төленбек. Тиісінше, төлемдерді үйді жөндеуге пайдалану мүмкіндігі енді болмайды, ол ресми алынып тасталады.
Мамандар "тұрғын үй төлемдеріне шығыстарды оңтайландыру әрі үнемдеу арқылы 26 миллиард теңгеден астам қаржы үнемделеді" деп отыр. Бұл түзетулер 2025 жылдың 1 шілдесінен бастап жұмысқа қабылданған қызметкерлер мен әскери қызметшілерге қатысты болмақ.
