Зайсан ауданындағы жаңа әуежайды тапсыру уақыты келер жазға шегерілді. Әу баста нысанды жыл соңында іске қосу жоспарланған еді. Мемлекет басшысының тапсырмасымен биыл Шығыс Қазақстан облысында екі әуе айлағының құрылыс басталды. Оның бірі Қатонқарағайда, екіншісі осы Зайсанда салынып жатыр. Қазір екеуінің де тапсыру мерзімі кейінге шегерілді.
Зайсан ауданында әуежай құрылысы наурызда басталған болатын. Нысан қаладан 25 шақырым жердегі ескі әскери әуе айлағының базасында салынып жатыр. Жалпы төрт бөліктен тұратын жұмыстың алғашқы екеуі аяқталды. Яғни сыртқы желі тартылып, шығып-кіретін жол және ұшып қону алаңы мен перрон салынып бітті. Ал үшінші кезеңнің, дәлірек айтқанда, әуежай ғимаратының жобасы құрылысшылар қолына тым кеш тиген. «Бұл белгіленген мерзімнің кейін жылжуына тікелей әсер етті»,- дейді олар.
Ербол Тәжібаев, жоба жетекшісі:
- Жылдың соңына дейін аяқтауға мұршамыз келмей қалды. Қазіргі мына салынып жатқан ғимарат — үшінші этап. Сол үшінші этап жобасы кішкене кешігіп келді, сол себептен осындай жағдай болып тұр.
«Құрылыстың ескі әскери айлақ орнында басталғаны, жұмыс барысын еш жеңілдеткен жоқ»,- дейді мамандар. Өйткені оның қаңқасы да қалмаған. Сол себепті әрбір учаске басынан бастап істеліп жатыр. Мәселен, ұшып қону алаңындағы аумақ екі метрге дейін қазылып,топырағы алынып,толық жаңартылды.
Сәбит Сахариянов, құрылыс учаскесінің бастығы:
- Зайсанның карьерінен тас әкеп салдық,оның үстінен шағыл тастар мен 2-3 қабат асфальт төселді. Бұл енді келешекте халықаралық аэропорт болуға есептелген және де кейінірек үлкен самолёттер қонуға мүмкіндігі бар.
Әзірге 2200 метрлік ұшып-қону жолағын, болашақта 3 мың метрге жеткізу жоспарланған. Себебі ішкі ғана емес көршілес елдерге бағыт ашылып, халықаралық рейс жасалады. Сағатына 150 жолаушы қабылдануы мүмкін. Демек соған сай жабдықталуы тиіс. Жұмысшылар да осы мақсаттан шығуға тырысуда.
Эльмира Ахметова, тілші:
- Бұл жерде 300 – ден астам адам екі ауысыммен еңбек етіп жатыр. Олардың арасында Зайсан, Тарбағатай аудандарындағы ауылдар мен елді мекендерден келіп жұмыс істеп жатқандар көп. Қазір күн суып кеттті міне. Бірақ осыған қарамастан жұмыс қыс бойы жалғаса береді дейді мұндағылар.
Дәл бүгінге жұмыстың 65-70 проценті аяқталды. Егер тағы да бір кедергілер туындап қалмаса, бұл әуежай келер жазда қолданысқа беріледі. Қатонқарағайда басталған авиациялық нысанды тәмамдау да сол уақытқа межеленіп отыр. Шекарадағы ел еңсесін көтеруге арналған екі жобаның құны 50 миллиард теңгеге жуықтайды
Авторлары: Эльмира Ахметова. Жігер Бабаханов
