Өмірбек Жолымбетов жарақаттарға жеке-жеке тоқталды.
2025 жылғы 28 мамырда Жетісу облысының қылмыстық істер жөніндегі мамандандырылған ауданаралық сотында Шерзат Полатты өлтіру ісі бойынша басты сот отырысы жалғасты.
Сотта Өмірбек Жолымбетов жауап берді. Ол оқиға кезінде Алматы облысы бойынша сот-медициналық сараптама зертханасында сот-медицина сарапшысы қызметін атқарған. 2024 жылғы 9 қазанда сарапшы Нұрқанат Ғайыпбаевтың денесін зерттеген.
"№447 24/17 сараптама қорытындысы бойынша, мен Алматы облысы полиция департаментінің тергеу бөлімінің аға тергеушісі, полиция мойоры Нариманұлының қаулысы бойынша, Нұрқанат Ғайыпбаевқа сот-медициналық сараптама жүргіздім. Қаулыда бір сұрақ қойылған, ол Нұрқанат Ғайыпбаевтың қандай дене жарақаттары бар, олардың шоғырлануы, келтірілу уақыты, пайда болу механизмі туралы сұрақ. Сараптама жүргізу үшін маған сараптама тағайындау туралы қаулы түсіндірілді, содан кейін Еңбекшіқазақ ауданы ауруханасынан медициналық картадан үзінді көшірмесі ұсынылды. Сонымен бірге бұл құжаттармен қатар, 1994 жылы туған Н.Ғайыпбаев өзі сараптама өтуге келді", – деді ол.
Сонымен қатар сарапшы Өмірбек Жолымбетов жарақаттарға жеке-жеке тоқталды.
"Қарап тексеру барысында Ғайыпбаевтың сол жақ көзінің қабағының астында мөлшері 3,0-1,5 сантиметр болатын көгерген түсті қанталау болды. Оң жақ құлақ қалқанында дәл осындай сипаттағы қанталау болды. Мөлшері – 2,0-1,0 сантиметр. Шүйде бөлігінде жұмсақ тіндерінің сынып. Қабынып тұруы болды. Бел тұсында сызықты формалы терісі сыздырылған жара болды. Оның беті қызыл түсті жұқа қабықпен қапталған. Мөлшері – 1,15-4,00 сантиметр. Оң жақ жамбасы тұсында қиғаш тік жара болған, оның жиектері тегіс, ұштары доғал келген, беті қызыл жұқа қабықпен қапталған. Бұл тері жабындары деңгейінде", – деді медициналық сарапшы.
Оқи отырыңыз: Шерзат Полат ісі: судья сотталушылардың бейнесін түсірген операторларды жауапқа тартты
