Құрама Штаттар Үндістан мен Қытайды РФ мұнайынан бас тартуға мәжбүрлеуге кірісті, деп хабарлайды inbusiness.kz сайты.
Батыс державалары мұнай сату мәселерінде Ресейге қарсы қысымды тіпті күшейтуге кірісті. АҚШ президенті Дональд Трамп мәлімдегендей, Үндістан РФ-дан энергетикалық шикізат импорттауды доғармақ. Бұл шешім жаһандық мұнай саудасына ықпал етуі мүмкін. Ал Ұлыбритания Ресейдің ірі мұнай компанияларына жаңа санкциялар жариялап отыр.
Украина президенті Владимир Зеленский болса, жұма күні Вашингтонда Трамппен кездесіп, әскери және энергетикалық қолдау сұрамақ. Бұл келіссөздер Ресейдің Украина энергетикалық нысандарына шабуылдарды күшейткен шақта өтеді.
Үндістан делегациясы да Вашингтонға сауда проблемасын талқылау үшін барды. Биыл АҚШ үнді тауарларына кедендік баж салығын екі есеге арттырғаны белгілі. Сол тарифтерді төмендету үшін Құрама Штаттар Делиге Ресей мұнайын импорттауды азайту туралы талап қоя бастаған.
Үш дереккөздің айтуынша, Үндістан зауыттары ресейлік мұнайды сатып алуды желтоқсаннан бастап қысқартуға дайындалып жатыр. Бірақ оларға ресми түрде импортты тоқтату жөнінде нұсқау әлі берілмеген.
2022 жылы Ресей әскері Украинаға басып кіргеннен кейін Еуропа ресейлік мұнайдан бас тартқаны мәлім. Содан кейін Мәскеу Қытай мен Үндістанға "қара алтынды" арзандатылған бағамен сата бастады. Қазір екі азиялық держава – Мәскеу үшін басты импортерлер.
КЕЗЕКТЕ — ҚЫТАЙ
"Мен Үндістанның мұнай сатып алғанына риза емеспін. Ол (Моди) бүгін Ресейден шикізат импорттамайтынына сендірді. Енді біз Қытайды да дәл осылай істеуге мәжбүр етеміз", – дейді Трамп сәрсенбіде журналистермен өткен кездесуде.
Үндістан Америка Құрама Штаттарымен тереңірек энергетикалық ынтымақтастықты талқылап жатқанын айтады. Бірақ оның сыртқы істер министрлігі бейсенбіде Моди мен Трамптың телефон арқылы сөйлескенінен бейхабар екенін мәлімдеп отыр.
Сауда деректері көрсеткендей, Үндістанның мұнай импортының 36 пайызы (тәулігіне 1,75 миллион баррель) Ресейден келеді. Бірақ Украина дрондары мұнай өңдеу зауыттарына шабуылды үдеткендіктен, Ресей қазан айында мұнай экспортын арттыруы керек. Себебі көмірсутегіні іште қалдырып, өңдейтін мүмкіндік азайып отыр.
БРИТАН САНКЦИЯЛАРЫ
Сәрсенбі күні Ұлыбритания ресейлік екі жетекші мұнай фирмасына санкция салды. Олар: "Лукойл" мен "Роснефть". Мұны Біріккен Корольдік үкіметі өзінің қаржы министрі Рэйчел Ривз АҚШ-қа аттанған шақта хабарлады.
Сондай-ақ Лондон Қытайдың мұнай өңдеуші Shandong Yulong Petrochemical зауыты мен Shandong Jingang Port, Shandong Baogang International, Shandong Haixin порт операторларына да санкциялар жариялады.
Бұған қоса, Ұлыбритания 51 кемені, соның ішінде сұйытылған табиғи газ тасымалдайтын жеті танкерді, Ресейден газ импорттап жатқан қытайлық Beihai LNG терминалын және Мумбайдағы (Үндістан) ресейлік мұнай өңдеу зауытын да шектеуге алып отыр.
Қытай Сыртқы істер министрлігі бейсенбі күні Британияның бұл әрекетін айыптап, оған қатаң наразылық білдірді.
РЕСЕЙ ӘЛІ ДЕ СЕНІМДІ
Лондондағы Ресей елшілігі санкциялар нарықтарды тұрақсыздандырып, британдық тұтынушылардың шығындарын арттырып, Ресейдің сыртқы саясатына ешқандай әсер етпейтінін ескертті.
Трамптың Ресей президенті Владимир Путинмен тамызда өткізген саммиті Украинадағы соғысқа қатысты ешқандай нәтиже бермеді. Содан бері Киев Ресей мұнай өңдеу зауыттарын дрондармен шабуылдауды күшейтіп жатыр. Ал ресейлік соққылар Украинада электр қуатын айтарлықтай кеміткен.
Айта кетсек, таяуда энергетикалық конференцияда сөйлеген сөзінде Путин биылғы жылы Ресейдің мұнай өндірісі шамалы ғана төмендейтінін атап өтті. Ал вице-премьер Александр Новак Ресей-Үндістан ынтымақтастығы жалғасатынына сенімді.
