Ең көп шетелдік науқастар Қытай, Үндістан және Түркиядан келеді.
2023 жылы Астанада ем алған шетелдік пациенттер 2022 жылмен салыстырғанда төрт есе көп болса, 2024 жылы бұл көрсеткіш тағы екі есеге артқан, деп жазады inbusiness.kz сайты.
Денсаулық сақтау министрі Ақмарал Әлназарованың айтуынша, кейінгі 5 жылда елімізге келетін туристер саны бес еседен астам өскен, ал олардың ішінде медициналық мақсатпен келушілердің үлесі жылдан-жылға артып отыр. Ең көп шетелдік науқастар Қытай, Үндістан және Түркиядан келеді.
Мамандардың пікірінше, Қазақстан қолжетімді бағамен жоғары сапалы емдеу және оңалту қызметін ұсынатын аймақтық орталыққа айналып келеді. Осы бағытты одан әрі дамыту үшін Туризм және спорт министрлігі мен Денсаулық сақтау министрлігі өзара ынтымақтастық туралы меморандумға қол қойды.
"Кардиохирургиялық қызмет сапасы бойынша Қазақстан әлемнің үздік 30 елі қатарына кіреді. Еліміздің клиникаларында бүгінге дейін 86 жүрек, 17 өкпе трансплантациясы, 460 жасанды сол жақ қарыншаны имплантациялау және үш толық жасанды жүрек орнату отасы жасалып, кейіннен трансплантация жүргізілді. Соңғы он жылда интервенциялық ем-шаралар саны үш есеге артты. Қазіргі таңда 42 коронарлық араласу орталығы мен 89 ангиографиялық қондырғы жұмыс істейді. 2012 жылдан бері ашық жүрекке жасалатын операциялар саны екі есеге көбейіп, қан айналым жүйесі ауруларынан болатын өлім-жітім үш есеге азайды", – делінген министрлік таратқан хабарламада.
