Дана Қарағұсова Қазақстан тарихындағы алғашқы әйел ғарышкер атанды.
2025 жылғы 8 қазанда Дана Қарағұсова Blue Origin компаниясының New Shepard NS-36 зымыранымен суборбиталық ұшуға қатысып, Жер атмосферасынан тыс кеңістікке көтерілген алғашқы қазақстандық әйел атанды, деп хабарлайды компанияның баспасөз қызметі.
Зымыран сәтті ұшып, ғарыштың шартты шекарасы саналатын Карман сызығына жетті және экипажды штаттық режимде жерге қайта қондырды.
"Бұл ұшу – өмірімдегі ең қатты қобалжуларымның бірі. Зымыранның көтерілу сәті ерекше әсерлі болды – денең әрбір қозғалысты сезеді, бірақ таңқаларлығы санаң соның бәріне қарамастан сабырлы болады. Салмақсыздық күйі дәл елестеткенімдей болды, алайда ішкі сезімдерімді сөзбен жеткізу мүмкін емес. Капсула сатыдан ажыраған сәтте, мен санамның бір бөлігі әдеттегі шектеулерден тыс кеткендей күй кештім – жерлік сезімнің бәрі жоғалып, тек шексіздік сезімі қалды. Бұл сезім шыңға шыққан сәттегідей: әлемнің қаншалықты кең екенін көріп, өзіңнің кеңістікте кішкентай ғана бөлік екеніңді ұғасың.Салмақсыздық кезінде жасаған алғашқы ісім – барлық аналарға арналған хатымды шығару болды. Бұл – менің анама және баласын арманына жетуде қолдайтын барлық әйелдерге арналған жеке құрмет білдіруім. Өзім де анамын, тіпті оның арманы мүмкін емес болып көрінсе де, балаға сеніп, қолдау көрсетудің қаншалықты маңызды екенін жақсы білемін", – деді Дана Қарағұсова.
Қарағұсова қазір Portals атты жаңа IT-жобаны әзірлеп жатқан командамен жұмыс істеп жүр. Жоба адамның ішкі тепе-теңдігін сақтауға және менталды тұрақтылықты дамытуға бағытталған.
Blue Origin компаниясы миссияны сәтті деп бағалап, "экипаждың зерттеуге деген тоқтаусыз ұмтылысы адамзаттың болашағына шабыт береді" деп мәлімдеді.
Айта кетейік, Дана Қарағұсова ұшуға дайындық кезінде ұлы Айтуармен бірге Қазақстанды таныстырып, экипаж мүшелеріне ұлттық сыйлықтар табыстаған. Сол сәттен бастап экипаж өздерін Space Nomads ("Ғарыш көшпенділері") деп атауға шешім қабылдаған.
Оқи отырыңыз: Дана Қарағұсова. Ғарышқа алғашқы болып ұшатын қазақ қызы кім
